U CEM ka JHADC, u Thombor Shiwat ynne da wanrah u yaka Mang Tangka u snem 2024-25 kawa Rs. 13,59,36,800 na iwa ye u pynmih.
Ynne kawa man leh kam ka sngi sdang ka Dorbar Mang Tangka ka JHADC, neiliang u CEM da pyntip u wa ha u snem mang tangka 2022-23, ka Council da ye ko wow pynmih Rs. 113,62,46,064 tangwa da hap wow pynlut Rs. 117,81,88,185 klur iwa mut wa Rs. 4,19,42,121 toh kawa ym ye u pynmih.
Ha u snem 2023-24, ka JHADC da yoh ko Rs. 46,63,70,500 kam ka dan na ki mar pohkhyndaw kiwa haap hapoh ka kyrdan Major Minerals wa Rs. 13,96,86,519 won na ki mar poh khyndaw kam u chyiap, u moo kiwa man kam ki Minor Minerals wei na ka dan kari won da yoh Rs. 14,50,93,319.
Da ong u leh wa kani ka bhah ka Council kawa da pynlait da ka sorkar da pynemkaam yow su tulop ya kiwa kreh ka Council, ki MDC kamjooh kiwa da lai Pension wei wow su leh ya ka ram ka Council.
Da antaan wa katni won ka Council dei bor yong ka daw ye ko wow pynmih Rs. 29,38,23,800 wei i bhah wa daw yoh na ka sorkar won u man i Rs. 97,50,00,000 wei ki Grant won Rs. 77,74,99,700, kamtæ neibynta ka Mang Tangka u 2024-25 da antaad wa daw yoh Rs. 204,63,23,500 tangwa iwa emkaam won man ko Rs. 218,22,60,300 iwa mut wa dapoi Rs. 13,59,36,800 ka wym ye u pynmih.
Yow ye u pyndap ya kani ka poisa ka wym ye u pynmih, ka JHADC da wanrah ko da ka Jaintia Hills Autonomous District Council (Village and Town Development Council) Bill, 2023 kawa da dep yoh yei mynjur haka dorbar tlang u 2023 wei dang yang yei mynjur u Lat ka jylla yow man aiñ noh ko.
U sdang leh yaka chnat Village & Town Administration Department yow pait yei pynkrehkaam yaka Building Bye Law yow yarap pynskem yei yoh nong ka Council.
Lyngba ka chnat Art & Culture ka Council, da phah ya waroh ki Tourist Spot deilang wa kiwa pynlai ki nadooh ki bru samen wa kiwa kwah wow wai ki thaw uiñke suwari wa thymme wow emkaam ki wow yoh bor wei wow paan NOC naka District Council.
U CEM da pyntip u leh wa kiwa kreh ka Council neibynta uni u snem mang tangka da pynduna cha 1286 ngut naka 1335 ngut yow duna i lutphut.
Heiyatoh wa ki Central Grant namo ka yarap poisa na ka sorkar pyrdi, da pynkreh neibynta 363 tylli ki Scheme wa Project nadooh wow chna thlu um, ki dooid, ki taw pynlang um, ki nan ri dakha, u thied Ambulance, u chna yung skur, ki paikhana paidbah, ki luti lai kjat, ki thaw sait that wa kiwi kiwi de.
Discussion about this post