Jowai: U Montri Rangbah ka jylla, u Conrad K Sangma ynne ka sngi da wanrah u ya ka mang poisa wa duna hadooh T. 1,150 klur neibynta u snem 2018-2019, kawa man 3.32 % yong ka GSDP ha yung dorbar chna aiñ ka jylla.
U Conrad da ong u wa ha u 2018-19 daw boon i yoh poisa ko hawa wyrchaw wa u 2017-18 neidaw wa yoh bhah ko na ka dan ka sorkar pyrdi wei da booh thong wow yoh T. 5059.77 Klur neibynta u snem 2018-19.
Da ong u wa na i yoh nong ka sorkar da antaad wow yoh ko T. 12, 554 Klur.
U Conrad da ong u lait na i su ya ka ram, ka sorkar daw pynlut ko hadooh kamwa T. 13, 704 Klur.
Da antaad leh wa ka sut ha u snem 2018-19 u man ko T. 653 Klur wei ka bai baam tymmen (pension) u poi ko T. 784 Klur.
Da pyntip wa ha u snem 2017-18 ka sorkar da yohnong ko na ka dan hadooh kamwa T. 1559 Klur wei ym na ka dan (Non-Tax) ka lap wa yoh ka sorkar toh T. 513 Klur.
Hei yatoh won waka kamai kajih ka jylla, u Conrad da ong u wa ha u snem 2016-17, ka GSDP hei dor yaaw wa katni da poi ko T 28, 445 Klur, wei katkam wa kheiñ sap pynyoo wa da ku 9.5 % ha u snem wa da dep.
U Conrad da ong u leh wa i ku ki kaam ha ki kamai kajih wa khain wa nai da ku ko 7.24% wei da ku leh 16.59 % ki kaam wa chaniah ha ki kaam wa heh wei ki won da ku ki 2.71 % ha u snem 2015-16 hadooh 2016-17.
Hei yatoh won wa i kamai ki paidbah da ku ko chaka T. 89, 432 chi snem neiwa antaad T. 85, 141 ha u snem 2016-17 iwa mut wa da ku kamwa 5.04%.
Manda poi won waka Goods and Services Tax (Compensation to States) Act, 2017, da ong u wa iwon iwon i dooh nong daw pyndap ka sorkar pyrdi lada duna ko 14% deiwa wyrchaw ya u snem 2015-16.
Da ong u leh wa i yabhah poisa cha ka Community and Rural Development toh kawa heh dooh deiwa booh T. 1457.94 wei da pynbood sa ya ka tnat puræ puthi wa T. 969.64 Klur, u chna sarok wa ki yingkeiñ da booh T. 628.04 Klur, ka chait ka khiah (Health and Ffamily Welfare) da booh T.613.31 Klur, Social Welfare da booh T. 537.72 Klur katwa ya ka bordiñ da booh T. 446.62 Klur.
Discussion about this post