U President ka Jaiñtia Hills Truck Owner’s Association (JHTOA), u Biangshwa Shylla da e jubab u yeiwa chah pynbaad u ha u Balen Thubru deiwa pynche wa u Balen toh uwa dadep Register hapoh ka JHTOA tangwa ym em won leh Renewal u hawa khut wow wan pynthymme wei hadien wa em ki dkhot ka seiñ da paan por ki, da e por ya ki kamwa 6 sngi yow pynthymme ki.
Kamtæ da kylli u cheiwon wiar u Balen ha kitu ki por wa da e.
Da pynche u leh hawa mih ka East Jaiñtia Hills District da em kiwa mih yow lai jar jiar ka yung wei da pdiang yeiwa da jied ki.
Heiyatoh wa i pynbaad u Balen ya u Biangshwa wa toh uwa pyrchah seiñ, da pynche u wa ym jooh em pyrchah u ya kawon kawon ka seiñ nadooh ki seiñ kynthai, ki seiñ khynroo wei haddooh wa yakhih ka MCTODA leh ym jooh em pyrchah u.
Heiyatoh wa i ong u Balen wa u Biangshwa toh u Agent ki Company, da ong u wa la kammon kammon leh ym jooh em ya him ya e u wa ki wei iwa yoh toh du i bynta wa toh u yoh wei ki wym toh bynta ym jooh dawa wei iwa yatoh wa ki Company toh du yei bai kit wei dor wa da booh da ka sorkar wei i chah pynbaad wa man Agent toh i wym ye u pdiang.
Heiyatoh wa i dor wa Rs. 9 wa yakhih ka MCTODA, u Biangshwa da ong u wym em kam u ka wa toh ka yakhih yong ka JHTOA tangwa ki lai booh hi ki ya ka dorkhat cha u Transport Minister, u Sniawbhalang Dhar yow dawa pynheh yei dor neibhah neipor cheipor ku ka bai Diesel, bai Tyre wa kiwi de ki mar ki mata wei ya kani ka dorkhat da lai booh ka ha ka 12-08-2025.
Neiliang u Minister da e buit u wow ya krehlang wa kiwa na East Jaiñtia, kamtæ da chna da ka JAC wei ini pynyoo wa oo kam u President ym em kam u ka kani ka yakhih dawa Rs. 9 tangwa deiwa ya krehlang wei da ya lai lutilang wei ym em kwah ki wow ang burom.
U Biangshwa da ong u wa Balen toh u bru uwa yaroh da oo ya oo hi wa da man u kam u President la 15 snem, kamtæ da kylli u hawa ka Star Cement da wan ko ha u 2001 wei pynmih Cement ko ha u 2005, ka Top Cement wan ko ha u 2003 wei krehkaam ko ha u 2006 kamtæ ter-ter wan kiwi de kiwa da em kattæ 8 tylli, wei ha itu i por u Balen toh u President ileh ym em paan u dei dor wa biang nadooh kitu ki por na kini ki karkhana.
Chooh chooh u Biangshwa da ong u wa kamwa tip u, heitu i por wa thied ka Star Cement wa kiwi de boon tylli ki kari yong ki hi, ileh wym em wa mih wow booh kyndon wa kam ki tre chnong toh u yoh ki wow kit 50-60 tylli chi sngi wei iwa mih i awri kattæ toh neidaw wym em kiwa yahkhmat wow leh yeini neibhah u Balen ym em pait u yei eh i chon khamtam ya ka mynried wei ini waroh i kjut toh iwa mih na u Balen wym em biang u kam uwa yahkhmat heiwa lada toh uwa tip toh u khut yachem yaklam u nadooh kitu ki por.
Neiliang won u Hari Talang, uwa man kam u EC Member ka JHTOA, da kylli u na u Balen uwa man kam uwa pait ya ka Transport wa em ha ki karkhana Cement iyi leh u hawa Rs. 300 kawi ka Truck chah ah ki neibhah toh u suk u yaklam wa u para Khasi para Pnar hawa kiwa boon toh kiwa na baar jylla kiwa em ha kitai ki karkhana.
Discussion about this post