Ka chatri ki seiñ kiwa kamai truck, kiwa chalan mar, kiwa chalan mooyong wa tip kam ka Joint Action Committee of Truckers, Suppliers, Exporters, Traders & Transporter Association da thoh ki cha u Montri Rangbah ka jylla, u Conrad Sangma yow pynsñiaw yei em ki Weighbridge wa man pyrchah ya ka aiñ ha u sarokbah NH-06 wa ha u NH-40E.
Ha ka chithi da ong wa ki da e ki ya ka chakri ya ka ri khlem pep yow pynikna wa u khoo, ki dawai wa kiwi ki mar wa emkaam poi ki khlem pep wei ha ki por wa em ka khlam leh ym em sangeh ki wow leh yei kaam yong ki neibynta ki bru ka jylla.
Tangwa da ong wa lada e ki ya ini i chakri leh, hapoh ka jylla Meghalaya da chah pyndik ki deiwa em boon tylli ki Weighbridge kiwa em ha NH-06 wa NH-40E heiwa da hap ki wow su chiboon ka poisa kawa da toh u man kam ka nong yong ki hadooh wa da em wa hap ki wow chah thngan da ki sngi neidaw wa da lut ka poisa du hei su ha kini ki Weighbridge wei iwa kthang dooh toh wa waroh ki Weighbridge toh kiwa man pyrchah ya ka aiñ.
Ka JAC da ong ko wa da tip wa waroh ki sarok National Highway toh ki yong ka sorkar pyrdi wei kiwa da pait hapoh ka aiñ National Highways Act kawa em hapoh ka sorkar pyrdi. Wei ki kyndon wa yatoh wa i kit palat pood kamjooh wow yada na ini wa i daiñ kuna toh kiwa da thoh hapoh kani ka aiñ. Kamtæ da ong wa ym em ha kiwon kiwon ki bynta kani ka aiñ wa ong wa ki sahep ka chnat Transport wa ye ki wow tuklar ha ki kaam ki National Highway. Hajrong ini da ong wa kiwon kiwon kiwa da chna da pynyieñ ha ki National Highway man ki pyrchah ya ka aiñ khlem da yohbor naka Ministry of Road Transport and National Highway.
Ka JAC da kdaw ko leh wa ka aiñ kawa chna ka jylla hapoh ka Motor Vehicle Act toh du wow murieh ya kini ki Weighbridge wa man pyrchah ya ka aiñ kiwa ym toh u krehkaam, neibhah wa ya ki National Highway toh kiwa pait da ka aiñ National Highway Act wei kiwa embor wow pynkrehkaam ya kani ka aiñ toh hapoh ka sorkar pyrdi ym toh da ka sorkar jylla kam ka Meghalaya.
Kamtæ da kyntu ya u Montri Rangbah wym toh wow pynbor ya ki wow chimbynta lang ki ha kini ki kaam wa man pyrchah ya ka aiñ deiwa su poisa ha kini ki Weighbridge wa da booh pyrchah ya ka aiñ kamjooh wow pyndam noh ya kini waroh kiwa em ha NH-06 wa NH-40E.
Ki seiñ wa em hapoh ka JAC toh ka Meghalaya Truckers Union, Meghalaya Traders and Transporters Association, East Jaintia Coal Suppliers Association waka Foreign Trade Chamber of Commerce Meghalaya.
