Da u Soolangki D. Laloo
Kamwa pynkynmoo yow Waheh Kambell Chullai da kha ha ka 8 tarik Thohlakhmi (February)1939 wei da ieh u yeini i pyrthai chongwasa ha ka 16 tarik Naiynru (June) 2012, hei lai luti heini ha sla khyndaw pyrthai kam u khynnah, u khynroo, u waheh daleh u chiboon ki kaam kiwa mih nei sap i chemphang wa sarot yong oo kam i chna ya ka Camera Chondur, i chna ya ki rot wa phylla heipor Behdieñkhlam, i pynmih pyrthai ya ka Khnap Thangbru (Eco-friendly Crematorium) wa kiwi kiwi.
U Waheh Kambell Chullai toh sakhiat U Khai-U Piar ka Ri- ka Jaitbru, uwa da e sap kyrpang u Trekirot heiwa i sap wei chemphang yong oo wow pynmih pyrthai ya ka Khnap Thangbru næ Eco- friendly Crematorium man i kyrkhu wei burom wa khroo ya ka ri wa ka jaitbru wei kawa e myntoi leh liang wanang ya ki bru wa pynemkaam ya ka kamjooh yada ko leh yei man i long ka rymaw heiwa neiliang ka sorkar leh hadien i pynchong yurim da tipmit wei yaleh chooh chooh u pynkroo yei naam i pyrtuid yong oo hakhmat ka pyrthai.
Kdar ha ki chiphaw snem nachwa ym ye u mylliñ lyndet wa ynne ka sngi 16 tarik Naiynru man ko ka sngi wow sah kynmoo sah khanatang, ka sngi kawa u lyoh doom i sñiawsih sñiawdiaw ya ka yung ka sem, ya ki khon ka Raij Jwai wa kamjooh ya waroh ki khon ka Ri Le Phaw Syiem- Khadar Dolloi wa hapyrdi wa dang dawa i por ka juk wow yoh ka pyrthai u sakhi u yoo yei sap wei chemphang wa sarot kiwa man i kyrkhu wei myntoi ya ka imlang sahlang, ieh syndet u Waheh Kambell Chullai yeini I pyrthai chongwasa.
Pynchongnia chongyurim yei sap wa kyrpang yong u Waheh Kambell Chullai wow pynmih pyrthai ya ka Khnap Thangbru (Eco- friendly Crematorium), yoo sakhiat wa man i kyrkhu wa khroo ya ki khon ka Niamtre ha kylleiñ ki chnong ki thaw heiwa da pynsuk ya kawi pa kawi ka manyung wow pyndep ya ka niam ka rukom yong ka thang ka riñ man da em i haap i oor, i pat rangbah rangsan. Ha lyndet ini iyi iyi waroh i kyrkhu wa da yoh, mih u dak kylli wow booh hei thij i pyrkhat yong ki khon ka niamtre, ka ri wa ka jaitbru, yi won i kaamram kam ki pateiñ ka juk wa che wa stad wow pynkhroo chooh chooh yei nam i pyrtuid u Waheh Kambell Chullai?
Chiphaw snem nachwa ynne ka sngi Wh. Kambell Chullai dajngai na i, Bru wa chynna jngai yei chadien chaphrang Khakti wymwiar wei sap kyrpang. Eco-Friendly Crematorium dachna, Kyllein ki chnong ki thaw dabna. Khmat Bru Kat wa yoo yei man yongka Du kiwa yaroh yei sap mi iwa paka. Chiboon yame wa ñiawliang ñiawtang Ya ki kaam wasah wa yooluti wa yang I por yame wan ymchah de i, Hukum Blai datoh wow lai neini. Wh. Kambell Chullai im i pyrtuid i naam yong me Chihajar Ngooh wei Sñiaw Makhane.
