U Transport Minister ka Indonesia u Budi Karya da pyntip wa 62 ngut ki bru wa kynthup ya 12 ngut kiwa pynlai yaka lieñsuiñ ka Sriwijaya Air da wiar ko hadien wa hær ko na nongbah Jakarta ynne ka sngi du hadien kattu katni i por wa da hær ko.
Tangwa neiliang kiwa thooh ya kani ka lieñsuiñ da pyntip wa da chem ki yaki tiar naka duriaw wa suba toh kiwa na kani ka lieñsuiñ.
Ka Flightradar24 kawa bood yei hær ki lieñsuiñ da pyntip ko lyngba u Twitter wa kani ka lieñsuiñ (Flight SJ182) da noh ko palat 10,000 phut hapoh 1 minit hadien 4 minit wa mih ko na Jakarta. Wei heipor wa mih ko na Soekarno-Hatta International Airport da em u slap wa joor yow lai cha Pntianak iwa jngai kamwa 740 Km.
Ka Sriwijaya Air kawa pynlai ya kani ka lieñsuiñ da pyntip ko wa dang thooh yutip chooh chooh ko chwa wow e yaka yutip wa bniah. Ka Sriwijaya Air toh kawa sdang ha u snem 2003 wei kawa hær du hapoh ka ri.
Kani ka liensuiñ kawa la 27 snem ka Boeing 737-500 toh kawa rim bar yaka Boeing 737 MAX ka Lion Air kawa da haap hajan Jakarta ha u snem 2018, heiwa waroh ki 189 kiwa em hapoh da yap ki. Kini ki 737 warim toh kiwa pynemkaam da kiwa boon katni.
Kini ki 737-500 toh kiwa da sdang wow kylliang noh yaki heiwa i por krehkaam ki da booh 25 snem heiwa hadien ini da man ki kiwa syad dor wow pynemkaam tangwa da chna yaki wow neh ki chi slem.
