Ynne ka sngi wa sdang ka Dorbar Mang Tangka ka JHADC, mar pynbna u Chairman, u Dr. Sankey Shangpung wa sdang ka dorbar, yieñ wot u MDC ka Saphai Sahsniang Constituency u Rikut Pareiñ wow wanrah da ka Point Of Order katkam ka AD Rule 123 hajrong i wym mih ki mat yaklam namo ka Motion wa wanrah u wei da paan pynche u leh hajrong ini.
Neiliang u Dr. Sankey da ong u wa kam u Chairman em u i bor wow pdiang næ kyntait ya iwon iwon iwa da kylli næ ka Motion wa wanrah hadien wa dadep bichaar bniah ya ki deiwa bood thij katkam ki kyndon.
U Rikut da yieñ biang u wow ong katkam ka Rule 62 em hi ka hok u Chairman tangwa em ki kyndon wa che hawa kyntait ya ki Motion.
Da pynsñiaw u yei sñiawkhia hajrong i chah pyndam kiwa da booh yow kylli khlem yurim wa biang.
Ka Deiwi Tongper kawa man ka MDC na Narpuh leh da pyrchah ko hajrong i wym mih iwa kylli ko heiyatoh wa ki Trading Licence, deiwa ong leh lada ki mat ymtoh wow yaklam hapoh ka dorbar.
Hadien ini da yieñ sa u Awhai Andrew Shullai uwa da ong wa chwa ka dorbar da yachem yaklam chwa wa u Chairman deiwa pynyoo yeiwa kylli neibhah ha ki dorbar wa dadep boon iwa kwah u kylli wa ki Motion wa wiar wei kini ki Motion ymtoh kiwa cha lait ka ADC Rules.
U Andrew da yieñ biang u deiwa pynrap wa hawa ym che iwa kylli dang hun ki tangwa u wiar hi-eh ki khlem che i daw wot hapyrdi wa da kreh chitom wow wanrah ya ki mat toh i wym ye u pdiang neibhah em ki yei hok wow yoh yei pynche.
Chooh chooh da ong u wa ini toh i leh dei bor katwa ngait, heiwa ki won dei maya ki paidbah da wanrah ya ki mat yaklam wa emkaam tangwa da pynwiar ki, kamtæ kammon ki paidbah u em ki i chaniah ya kani ka dorbar.
Discussion about this post