Ka Ri Khad-ar Doloi ka Ri Jaiñtia,
Ya u khlawait ka Ri ha pha da kha,
Na ka kur Sookpoh Khad-ar Wyrnai,
Na u trop ksiar trop rupa ka men rimai.
Woh Kiang Nangbah, Aa! Woh kiang Nangbah,
I naam i pyrtuid yong me dang sah,
Dei mynsien dap chynrang wow yada ri,
Da’u radang hun mi u pynchah ha’u tylle pasi.
Ong mi nga u tre ri nga wow synchaar,
Ym em hok u dohlieh heini ha ri Pnar,
Bar wow man broo ha khmat yong ki,
Ladei snaam u theh leh wym randien mi.
Daka wait ka stieh u khnam ka ryntieh,
Wow yaleh pyrchah mi ya ki dohlieh,
Nongchoon wa biang ki tup ki man,
Dei mynsien wa chlur tia mi chaphrang.
Ka bei yong me wa dap du i tieñ,
Chibor i pyrkhat, khian sei mynsien,
Katwa yow ma yong me u Ksan Sajar,
Yei rta yong oo da pynthkut ka sorkar.
U Doloi tynker u wa chet kylla,
Da sdang u li palang sa ya ka khajna,
Ha yung ka pli ka Lakhi Pyrdiang,
Kynjat uru ya ki kchu ki pliang.
Chnong Mynser i thaw rieh tngen mi,
Da pynkhreh yaka thma wa u myndær ri,
U wa bood ya me u Long Sutnga,
Da yah u yaki pharæng cha Umpara.
Hadien wada kem ya u Kiang Nangbah,
Cha u sahep Donspot ya oo da yah,
Katwa ym bien u paan maap u chah rem,
Kamtæ da rai pasi noh ya u Woh Kiang.
Kyntien khaddooh na u thylliej dasai:
“Lada kyruiñ i khlieh O cha mih sngi,
Ym slem de da laitlooid ka ri,
Lada kyruiñ won i khlieh O cha sepsngi,
rata ka ri iong nga ym lait de ko nei chong broo..”
Ha u tylle pasi neibhah ka ri,
Yei hok u knieh ym chongngiah mi,
Neibynta ka ri ka jaitbru yong i,
Hun mi u yap ha’u tylle pasi.
Woh Kiang Nangbah, Aa! Woh Kiang Nangbah…
Discussion about this post