Ka Simsang Rangers waka Symper Challengers da yoh ki wow psiah Final haka Senior Women T20 Challenger Cup wa pynman da ka Meghalaya Cricket Association deiwa jop ya jar jiar ki yalehke yong ki ynne ka sngi.
Ka yakhun Final u pyman myntsep ha madan Polo.
Ynne da sdang ya ka yalehke da ka Umiam Queens kawa da yoh nyngkong deiwa jop la arsien tangwa da rem ko da 43 Run haka Simsang. Ka Symper won da jop ko ya ka Myntdu Raiders da 18 Run.
Ka Myntu Raiders ym em jop ki chisien leh na ki le tylli ki yalehke. Ka Umiam, Symper waka Simsang da yoh ki mar 4 Point, kamtæ kheiñ da ka Net Run Rate kamtæ da yoh nyngkong ka Simsang, wa ar ka Symper waka Umiam hei wa le.
Ha ka yalehke wa nyngkong, ka Symper da yoh ko 121/4 na ki 20 Over hadien wa phah Bat nyngkong ya ka. Ka Player-of-the-Match ka Debasmita Dutta (67 na 59, 12×4) da kamai ko palat ya chiteiñ iwa ye ka liang yong ka u kamai. Ka Daiaka Warjri da yoh ko 2/23 ya ka Myntdu.
Ka Warjri da lehbha ko leh da ka Bat yow yoh 15 Run deiwa em leh sa kiwi ki le ngut kiwa yoh palat 10 Run. Ka Myntdu da ye ki wow kamai kamwa emkaam tangwa dooh noh ki ya waroh ki Wicket deiwa kamai 103 na 17.4 Over. Ka Suriti Kumari Ray (3/13) toh kawa lehbha na kiwa kawang bol, ka Dutta (2/12), Jayshree Singh (2/19) waka Fenny Nongrum (2/20) da yoh ki mar ar Wicket.
Ha kawi won ka yalehke, ka Simsang da kamai ko 147/6 hadien wa phah Bat nyngkong ya ka. Ka Luiza Tamang da kamai boon dooh ko deiwa yoh 32 katwa ka Deimaphishisha Lamare 27, heiwa da em leh ki 41 tylli kiwa yoh mynkna ki Run namo ki Extra. Ka Rubi Chetry da lehbha ko deiwa yoh 3/15.
Ka Umiam hawa kdong Run da neh ko chadien hanla kamai ka Chetry 56 wei da kut i kamai ki da 104/6 deiwa lut ki Over. Yei naam Player-of-the-Match da yoh ka Neelam Roy kawa yoh 3/12 na ki 4 Over katwa ka Tamang (1/21) da pynhaap ko ya ka Chetry ha ka Over wa khaddooh.
Kamtæ ka Simsang waka Symper daw yachem ki haka Final.
