Ka Meghalaya da rem ko ha ka Manipur da 39 Run ha ka Women’s Senior One Day Trophy ynne ka sngi wa pynman ha Kolkata.
Ka Manipur da jop ko ya ka kylla khlem wei da jied ko wow Bat nyngkong wei deiwa lehbha kiwa boon kiwa Bat yong ka, ka Manipur da kamai ko 228/6 na ki 50 Over.
Ka Meghalaya da yaleh ko khlem ka Captain ka Debasmita Dutta, kawa da takha ynnin ka sngi hei jop pyrchah ya ka Bihar, kamtæ da man Captain ynne da ka Daiaka Warjri.
Kamwa leh ynnin, ka Meghalaya da pynemkaam ko 9 ngut kiwa kawang bol, heiwa soo ngut da yoh Wicket ki. Ka Pinky Chanda da yoh ko 2/36, katwa ka Deiphibapynshngain Lyngdoh Mawnai da yoh ko 2/47. Ka Riticia Nongbet da yoh ko ya ka Wicket wa nyngkong yong ka ha kani ka Tournament (1/23), ka Ajima Sangma (1/39) kawa da lehbha ynnin wei kattu waroh da yoh ko 8 Wicket na ki le tylli ki yalehke.
Hawa kdong yei thong, da em 5 ngut kiwa Bat ka Meghalaya kiwa da yoh palat 10 Run wa yahkhmat da ka Guest Player ka Vaincy Chaudhary, kawa da kamai boon dooh 64 Run wa kynthup ya ki 5 tylli ki 4 Run. Ha kani ka yalehke da wan ko hei wa soo yow Bat wei ini da man ko iwa biang i thaw ya ka katwa na kiwa sdang kiwa Bat nakhmat, ka Luiza Tamang da yoh ko 24. Na kiwa Bat cha tre, ka Solina Jaba da yarap ko 23 Run. Kiwi de kiwa da ye wow yoh palat 10 Run toh ka Warjri (13), Lyngdoh Mawnai (12) waka Neha Hajong (12) tangwa ka Meghalaya da dooh lut ko ya waroh ki Wicket deiwa kamai 189 na ki 43.2 Over.
Ka Meghalaya daw yoh ko wow chong ngiah chi sngi chwa wow yachem ko waka Nagaland haka 3 tarik.
