I lehbha kiwa kawang bol ka Meghalaya ym ye ki wow pynjop ya ka Arunachal Pradesh ynne ka sngi ha ka Women’s U-19 One Day Trophy.
Ha ka yalehke ynne ka sngi wa pynman ha Bhubaneshwar, ka Meghalaya da jop ko ya ka kylla khlem wei da jied ko wow Bat nyngkong tangwa da ye ko wow kamai du 65 Run donhi. Ka Arunachal da rap kyrbeh i kdong Run ko tangwa da ye ko wow jop deiwa sah sa 4 Wicket ha kti.
Ka Neelam Roy toh kawa samen wa ye u kamai palat 10 Run deiwa yoh 12 Run. Kiwa Bat da ye ki wow neh slem tangwa chem chitom ki wow tne ya ka bol deiwa yoh Run heiwa da haap lut ki Wicket deiwa kamai 65 Run na ki 38.2 Over.
I lehbha ka Sistilin Ryntathiang da ka bol (3/16) da pynhaap ko ya ki le ngut kiwa Bat ka Arunachal deiwa kamai du 21 Run. Ka Icyful Mary Lyngkhoi (1/2), ka Marme M Sangma (1/6) wa ka Mansi Anand (1/17) toh kiwa da yoh u pynhaap Wicket, tangwa ka Megha Sharma da pynjop ko ya ka Arunachal deiwa kamai 31 Run khlem haap.
Hadien wa ar tylli ki yalehke da dooh neidaw u slap wa arsien i rem, ka Meghalaya daw yachem khaddooh ko wa ka Jammu & Kashmir mynstep ka sngi.
