Kamwa ha kylleiñ ki thaw da lehwarom yaka World Tuberculosis Day ynne ka sngi hajrong ka phang “The Clock is Ticking”, ha Jowai leh neiliang ka District Tuberculosis Control Society, West Jaiñtia Hills, lyngba ka National Tuberculosis Elimination Programme da leh warom ki deiwa pynman yaka Motor Bike Rally kawa da sdang na laad College Kiang Nangbah ter ter u sarokbah deiwa lai lyngba na Iawmusiang, Chutwakhu, Khimusniang, Chilliangraij, Iongpiah, Dulong wei pynkut won ha District Tuberculosis Centre ha Panaliar.
Ha kani ka Rally da tem deilang i sur wada chna kyrpang hajrong ka phang yong ka kjut TB, iwa man chibynta wow pynsñiawthooh yaki paidbah wow wan chakhmat hawa em ki dak ki chin neibynta u yoh yaki laad sumar wa mynkna.
Hei yaklam wa ka Dr. E.B.V Laloo, In-charge District Tuberculosis Officer kawa toh u pait yaka Ri-loom Jaiñtia waroh kawi, da ong ko kamwa ka phang yong kani ka sngi kawa ong “The Clock is Ticking” iwa mut wa i por ym yang i, kamtæ ha kani ka sngi khut kyntu kyrsu ko ya waroh nadooh kiwa kreh yong i chait i khiah, ki paidbah wow ya ksohktilang neibynta u thooh ya ki bru wa em ya kani ka kjut, neibhah dang boon ki bru wym pu poi cha ki thaw sumaar.
Da ong haroh ko wa i kjut TB toh kawi naki jait kjut watip kam ka Silent Killer Disease kawa man ka 3 minit ye ko u pynyap arngut i mynsiem bru. Deiwa pynrap wa kani ka kjut toh kawa ye u pynchait lada dih dawai tista, wei ye leh u yoh yaka bai baam wa T. 500 chibnai, tangwa lada ym dih dawai tikna ye won u yoh yei jait kjut wa rap khor.
Ki dak ki chin yong kani ka kjut kynthup i ya i khai-kyoh, iñ-doh wa neh kamwa ar le tayaw. Em leh arjait ka kjut TB kawi kawa ktah yaki snier wei kawi won wa ktah yaki bynta waphær waphær i doh i pran ki bru. Kamtæ kyntu ko wow chimkhia deiwa wan mih cha ki thaw sumaar sorkar wa khlem i su nadooh ki Test wa ki dawai.
Da pyntip ko wa ha kani ka TB Centre ha Jowai katni da em leh ka CB-NAAT Test kawa syad lada lai cha ki thaw sumaar ki bru samen, tangwa heini won yoh mynkna, najrong wa em leh ka Microscopic Examination.
Neibynta kitu wa em cha jngai kam cha ki thaaiñ nongkyndong, jooh pynman ki yei lai thooh ya kiwa chitom (Active Case Finding) deiwa lai daka kari wa em deilang ka CB-NAAT Test neibynta wow Test yaki bru ha itu hi i thaw wa lai ki.
Chooh chooh ka Dr. E.B.V Laloo khana ko wa kiwa yoh kjut TB wada wan cha ki thaw sumaar ha u snem wa dep da poi ki palat 600 ngut, napyrdi kini em kiwa dam u dih dawai, em kiwa yap tangwa kiwa boon hi toh kiwa dih dawai tista kamwa 80-90% wei da chait ki leh.
Haka yalang tbian wada pynman ha District Tuberculosis Centre da saam khusnaam leh cha ki wakreh kani ka chnat krehkaam kiwa da kreh slem wei kreh bha yei kaam.
Hachwa kani ka sngi da em leh ka Poster Campaign, Mask Campaign, i saam kot lakdop, ki Awareness Programme ha waroh ki PHC, katwa ynnin ka sngi won neiliang u Deputy Commissioner ka West Jaiñtia Hills District u Garod LNS Dykes da pynlait paidbah u yei sur (Music Video) wada rwai hajrong ka phang yong ka kjut TB ha yung krehkaam yong oo.
