Jowai: Ha ka 29 tarik u Naitung (April) hadien wa wan u slap wa joor, ka Dorbar Chnong Nongtalang Mission da khai ko wow yoo u khyrngiat yei jngut wei ktieh ka um kawa da saam cha ki 135 tylli ki manyung hapoh ka chnong wei ini da jia i neidaw i tih moochuni najan ka tyllong um wa saam cha ka chnong kawa tip kam ka Amkru kawa em hajan Nonglamin.
Neiliang ki heh ka PHE (RWS) wa khlieh da ka Executive Engineer ka R. Kynjing chirup wa kiwa kreh kani ka chnat mar tip yeini da hiar ki cha kani ka thaw wei wa da khang noh ki ya kani ka um neidaw wa ym man ko kawa miat wow pynemkaam ki bru. Ka PHE da sdang ko wow saam um hapoh ka chnong nadooh u snem 2013 khlem sangeh.
Katkam wa man katni hapoh ka chnong da saam um da ka PHE kamjooh da ka chnong tangwa kini pyn ar da man ki kiwa da khang neidaw wa ktieh ware ka um.
Kiwa kitkaam ka chnong ynne ka sngi hapoh i yahkhmat u Waheh Chnong, u Batkupar Rymbui wa u Secretary chnong, u Formi Rymbui da yachem ki wa kiwa pathai khubor wow pynsñiaw yeini wa chem chitom hapoh ka chnong.
“La 60 snem tam ym jooh em jia kamni tangwa kani man ko ka sien wa nyngkong wa ktieh ka um kawa da saam chapoh ka chnong,” da ong u Batkupar deiwa pynrap wa ini toh neidaw i tih moochuni.
Da ong u leh wa ha ki snem wa dadep da jooh jia kamni tangwa ym em joor kamwa man ka um katni.
Heiyatoh won wa ka luti wow lai ka chnong wow pynbait ya ini i kaam, u Formi da ong u wa ka chnong daw khut ko ya ki tre ki paar moochuni wow yaklam pynbait ya ini i kaam.
Da ong chooh chooh leh wa lada ymye u pynbait ya kani ka kaam wot chadooh cha yung bichaar u lai ki khnang wow yoh ki paidbah yei hok yong ki.
Discussion about this post