Jowai : Ka JSU Seiñ Bei hadien wa em kiwa kynnoh boonjait ya ka seiñ hei yatoh wei dawa wo chna ya ka Committee hei yatoh wa ki dak thoh Pnar lyngba ka JHADC ka seiñ da pynche ko deiwa ong :
1. Ka JSU ym em yumut ko wow tympiah jaidbru tangwa yieñ skem ko ha ka nongrim wow pynneh wow pynskem yow pynpliah yei ktien ‘Pnar’, neibhah wa katkam wa man katni da tlot ware ka ktien Pnar heiwa da klam khleh takulæn hi-eh wa ka ktien Khasi, Pharæng, Dkhar wa kiwi kiwi.
2. Kam wow pynkynmoo ha ki phaw snem wa da lai da jooh em ka ‘Seiñ ki nongthohkot ka Ri Jaintia’ kawa kynthup leh ya u tynde u Dr. B Pakem kam uwi naki dkhot, wei ka thong ka Seiñ toh wow kyntu wei wow pynskem ya ka ktien Pnar. Kamtæ ka JSU da sñiawbiang ko wow boodien ya ki dak kjat kini ki khroo pyrkhat yow pynneh pynsah ka ka ktien kawa da jan wiar jait. Kani ka thong toh yow pynneh ya ki kyntien kam ‘ka ab’, ‘Tana’ wa kiwi kiwi ki wym em de u pynemkaam i.
3. Heijooh i por kam ka nongmuna, em leh ki kyntien Pnar kiwa ym ye i u kynnoh bha lada pynemkaam i da ki dak khasi kam u Sniuh heithaw u Sniooh, i bluh heithaw i Blooh, wa kiwi kiwi. Heijooh i por lada ym em ki dak thoh Pnar wei rukom kynnoh wa paka iwa man salonsar da pyntlot ko ya kiwa puræ næ thoh neibhah i pynemkaam i da u ‘ C’ heithaw u dak ‘S’ em kiwa pynemkaam da u ‘Y’ heithaw u dak ‘i’ kamtæ ter ter.
Kamtæ, hei yatoh weini i bynta, ka JSU kwah ko u pynche wa ka seiñ kwah ko u pynskem yei ktien Pnar i ktien wa yaklam na warim wajah wei ini ym muy i wow kyntait noh yei ktien Khasi.
Heijooh i por ka seiñ da ong ko leh wa ka kyrchaan bha ko yei dawa wow pynpsiah ya ka ktien Khasi hapoh ka 8th Scheduled.
Discussion about this post