Kam chibynta wow knær ya i chakri wei wow pynku ya ka yarong poisa wow pynlai ya ka Creché, ynne ka sngi ka Panaliar Women Welfare Organisation (PWWO) da pynman ko ya ka Food Fest namo ka yaaw dai baam ha Yungwalieh ka Panaliar, Jowai.
Ha kani ka sngi u MLA ka Jowai, u Wailadmiki Shylla da man u kam u kongsan hei emlang u MDC ka Jowai South, u Saron Paswet kam u symbood kongsan.
Ki manbei na jar jiar ki kyntoit ka Panaliar da pynkhreh ki jar jiar ki baam wow dai ha kani ka sngi.
Chwa wow sdang ka yaaw dai baam da em ka yalang wa pynlai da ka Biangtre Bamon kawa man kam ka Chairperson ka PWWO.
U Waheh Chnong ka Panaliar, u Riquoma RQ Laloo hawa e yei klam da ong u wa ki kynthai man ki ka bynta wa emkaam bha ha ka imlang sahlang nadooh ki por wa seiñ chnong ya ka Jowai. Da ong u wa nadooh ki por nachwa hapoh Panaliar ka Seiñ Kynthai jooh em ko heiwa da yohbor na ki Kñi wa ki waheh wasian wow mih chaphrang wow yah u yalam ya ka loom ka pdeiñ.
Ka Waisa Sumer kawa man kawa e buit ka PWWO da khana ko ya ka parom yong ka seiñ heiwa da Register ya ka ha u snem 2018 wei da sdang won ya ka Creché ha ka 30 Wisu 2019 deiwa em du 10 ngut ki khynnah wei katni em 20 tam ngut ki khynnah wa ar ngut kiwa kreh.
Da ong ko wa i chakri hanlada man i du neibynta ki 20 ngut ki khynnah tangwa i myntoi won man i ya ki 20 tylli ki manyung.
U Saron Paswet hawa e yei klam da kitbok u ya ka PWWO wow lai ko chaphrang wa ki kaam yong ka ha ka imlang sahlang. Da ong u wa kani ka Food Fest man ko kam ka yachemlang wei dei e sñiawbha kyllooid mynsien daw ye u pyndap yeiwa emkaam ka chnong ka thaw.
Neiliang u Wailadmiki Shylla da e khublei u ya ka PWWO wa da pynphooh ko ya kani ka sngi wei da kreh ko leh chiboon ki kaam neibynta ka chnong ka thaw. Da yaroh u ya ka chnong Panaliar neibhah wa da em i krehlang ki manbei, ki manpa wa ki khynroo khyllood ha kiwon kiwon ki bynta neibhah wa ha ka imlang sahlang emkaam yei yatylli wa i yakrehlang.
Da ong u leh wa ka jaitbru yong i man ko kawa kyrpang bha neibhah kam ha ka ri USA dang ini pynman aiñ ko hei wow su ya ka nong wa salonsar cha ki chynrang kynthai katwa ha i won da man i iwa da slem bha nadooh ki por nachwa nadooh i thaw i bhaw wa i hot i pot wa da e cha ki kynthai wa ki manbei bait. Da kyntu u leh ya waroh wow pynduna yei por wa pynlut ha ka Mobile Phone neibhah katni emkaam bha wow mih neitæ wow embynta ha ka yung ka sem deiwa kyntu leh ya ki manbei manpa wow sneiñ ya ki khon yong ki.
Kiwi kiwa da klam ha kani ka sngi kynthup ki ya u Careme Phawa uwa man u General Secretary ka chnong katwa ka Suma Passah won kawa man ka Secretary ka PWWO da e ko ya ki kyntien khublei.
Ha kani ka sngi neiliang u Wailadmiki Shylla da e kti u leh ya ka Cheque wa T. 1 lak cha ka PWWO wa T. 5 lak cha ka Dorbar Chnong Panaliar wa kamjooh leh ka Work Order wa T. 5 lak cha ka chnong wei da lai pait u leh ya ka Crèche ka PWWO.
