Ka NPP Primary Unit Panaliar kam chibynta wow yakhun pyrchah ya i pynemkaam Drugs da pynman ko ya ka lympung yalehbol kawa tip kam ka Super 7 Knock-Out Football Tournament hajrong ka phang “To rise above the influence, choose life not substance abuse”.
Ya kani ka lympung da pynman ha madanbol ka Panaliar wei da sdang ya ka ynne ka sngi heiwa u Eddistone Shylla da man u kam u kongsan katwa u Wanna Lyngdoh kam u symbood kongsan ha ka yalang wa pynlai da u Lonely Phira, Vice President ka NPP Panaliar.
Ha kani ka lympung kiwa jop yei naam Champion u yoh ki Rs. 40,000 katwa kiwa rem ha ka Final won u yoh ki Rs. 20,000.
U Marryngkat Syngkon, uwa man u Secretary ka Panaliar da kyntu u ya ki khynroo khamtam wow bood ki katkam ka phang pyrdi namo ka Theme yong kani ka lympung wei wow lai ki chakhmat deiwa jied yeiwa bha ymtoh u chah pynchoi ha ki sih wa boonjait.
U Wanbha Lyngdoh da kyntu u ya ki khynroo wa em ka sap hei yalehbol wow tia chakhmat ymhoi u man kiwa swe neibhah kani leh man ko kawi na ki laad kamai ha ka juk katni.
Neiliang u Eddiestone Shylla da e u ya ki kyntien sneiñ ya kiwa yalehke wow pynemkaam yei rukom yalehke katkam ki madan deiwa ong wa yaphær ka rukom yaleh ha madan heh wa ha madan khian, kamjooh da kyntu ya ki wow man kiwa em i mynsien yalehke namo ka Spirit of Sportsmanship.
Heijooh i por da kyntu u ya ka Unit NPP Panaliar kamjooh kiwi tawon wow pynman chooh kam kini ki yalehke hapoh ki chnong ki thaw yong ki.
Ha kani ka sngi da yoh ki kyntien ngoohblai na u Marki Lakadong wa ki kyntien khublei na u Heipor Syngkon uwa man u Secretary ka NPP Youth Wing Panaliar.
Ha ka yalehke ynne ka sngi ka Panaliar da jop ko ya ka Lumsuwe da 4-3.
Discussion about this post