Kam chibynta wow man kiwa da pynkhreh wow yakhun ya ka khlam u COVID-19 hapoh ka ri, ki karkhana wa chna ya ki PPE, Mask wa Ventilator, kamjooh kiwi kiwi ki mar, da kreh man ka kynta wow pyntikna wa biang kini ki tiar khamtam neibynta ki bru kiwa yakhun pyrchah ya uni u khñiang.
Ka Bharat Electronics Limited daw chna ko ya waroh ki Ventilator, katwa ki karkhana chna dawi won da kular ki ya ka sorkar wa wym duna kini ki dawai kam ha kini ki por.
Ki Personal Protection Equipment (PPE) neibynta ki wakreh ha ki thaw kyrpang namo ki Isolation Area wa ki Intensive Care Unit da chna ya ki pyn hapoh ka ri heiwa ka sorkar pyrdi da pynchlur ko wow chna ya ki pyn hapoh ka ri hi.
Ka Ministry of Textiles wa ka Ministry of Health and Family Welfare da kreh ki chirrup hajrong ini i thong wow pynbiang ya kini ki mar heiwa da phah thied (Order) hadooh 21 lak tylli ki PPE.
Katkam wa man kattæ da pynmih hadooh 6-7,000 tylli chi sngi ya kini ki PPE wei da antaad wow pynku cha ka 15,000 tylli chi sngi ha ka tayaw wow wan.
Hadooh ynne ka sngi da em 3.34 lak tylli ki PPE ha ki thaw sumaar (Hospital) ha kylleiñ ka ri heiwa da thied hadooh 60,000 tylli ki PPE Kits da ka sorkar pyrdi. Neiliang won yong ka Indian Red Cross Society da pynkhreh ko hadooh 10,000 tylli ki PPE na ya kiwa da yoh wei da saam ya ki leh kamjooh.
Sa 3 lak tylli ki PPE wa da e sñiawbha won u poi ki ha ka 4 Naitung (April) wei da phah thied leh sa kamwa 3 lak tylli ki PPE na ki Ordinance Factories.
Heiyatoh wa ki N95 Masks wa da chna hapoh ka ri da ki ar tylli ki karkhana da ye u pynmih hadooh 50,000 tylli ki Mask chi sngi wei dang yaleh ki wow pynmih namo wow chna hadooh 1 lak tylli ha ka chi sngi ha ka tayaw wow wan.
Neiliang ka DRDO leh da yakreh ko wa kiwi ki karkhana wow pynmih hadooh 20,000 tylli ki N99 Mask ha ka chi sngi.
Katkam wa man kattæ ki Hospital hapoh ka ri em ki hadooh 11.95 lak tylli ki N95 mask wei sa kamwa 5 lak tylli won da saam ya ki ha ki ar sngi wa da lai wei sa kamwa 1.40 lak tylli won dang saam ya ki ynne.
Chooh chooh da em 10 lak tylli ki Mask kiwa man chibynta yong ki PPE da thied ya ki na Singapore.
Heiyatoh won wa ki kor Ventilator wow pynemkaam wow sumaar ya kiwa yoh ya u COVID-19 neidaw wa chem chitom ki wow riñ mynsien kawa tip kam ka Acute Respiratory Disease Syndrome (ARDS), katkam wa man kattæ em duna 20 ngut kiwa yoh ya u COVID-19 kiwa chaniah ha ki Ventilator Support.
Da tipmit leh ya ki 14,000 tylli ki Ventilator ha ki thaw sumaar waphær waphær ka ri wow sumaar heiyatoh wa kiwa yoh ya u COVID-19.
Ki karkhana hapoh ka ri, kam ka Agva Healthcare, Noida da ye ko wow pynmih u chna ya kini ki Ventilator wei da phah thied hadooh 10,000 tylli kini ki Ventilator wei da yooluti wow sdang yoh ya kini ki tiar nadooh ka tayaw wa ar yong u Naitung (April).
Chooh chooh da phah leh wow thied hadooh 30,000 tylli ki ventilator na kaBharat Electronics Limited ka wow kreh chirup wa kiwi ki karkhana heiyatoh wa ini.
Heijooh i por da tyrwa thied leh ya kini ki kor Ventilator na ki karkhana na baar ri kam naka Hamilton, Mindray waka Draeger heiwa ka chnat Ministry of External Affairs leh dang yaklam ko wa ki karkhana na China hajrong ini.
Discussion about this post