Jowai: Ka Women Welfare Organisation, Seiñraij Jowai toh kawi na ki seiñ yong ki khon kynthai kawa da kreh chiboon ki kaam neibynta i miat i bha ka imlang sahlang, kamtae heiyatoh wow ye chooh chooh ko u pynjanai yei chakri yong ka, kiwa yahkhmat kani ka seiñ ha kani ka tayaw chimkhia ki wow khut pynman ya ka Food Fest.
Ya kani ka yaaw dai baam bang, baam thiang kawa tip hei ktien para kam ka Food Fest da pynman ha ka Hat 16 u Naikhynde da ka Womens Welfare Organization, Seiñraij chirup i yakrehlang kiwi ki Seiñkynthai yong ki khon ka Niamtre yong ki dong ki chnat wa kynthup ya ka Loomkyrwiang, Chilliangraij, Panaliar, Dulong, Loomiongkjam, Loompyrdi Iongpiah wa ka Umchangiar.
Ha kani ka sngi chwa wow yoh ki paidbah wa wan sakhi u mad ya ki baam kiwa da pynkhreh ha ki waboon rukom da ki khon kynthai yong ki dong ki chnat waphær waphær, da em chwa ka yalang yahkhmat hei pynlai ka Hima Lakiang, Chairperson WWO, Seiñraij, ka Waisa Sumer yieñ ko wow siang ki kyntien ngooh blai katwa ka Juliana Challam, Secretary, WWO Seiñraij hawa kut yieñ ko wow e ki kyntien khublei.
U H. Toi hawa e ya ki kyntien heiyatoh wa kani ka prokram da kdar u wow khanna pynsiaw ya ki waboon ki kaam kiwa ka WWO, Seiñraij da leh ko na ki por cha ki por kiwa yatoh wei miat i bha ka imlang sahlang heiwa ha lyndet ki waboon ki kaam yong ki khon kynthai e u leh i burom wakhroo cha ki manbei kiwa chim ka yukit wakhia hei wow pusai ya ki khon ki ksu wa ya ka yung ka sem waroh kawi.
U Dr. D.I Kjam won hawa e ya ki kyntien kam u kongsan da yaroh u ya ki khon kynthai ka Seiñraij kiwa da chimkhia wow kreh yei kaam na ki por cha ki por wei da ong u leh i pynman ya kani ka jait prokram ym mut ware ko du kat wow pynmih poisa næ pynheh ya ka yarong poisa ka Seiñ, kyrpang leh man ko chibynta wow pynneh pynsah næ pynyoorong pynyoo pyrthai yei baam bang yong-i dahi kam i jadoh, dohkhleh, dohsaiñ wa kiwi kiwi.
Discussion about this post