Ka seiñ Hynñiewtrep Youth Council (HYC) Narpuh Circle lyngba u Publicity Secretary ka seiñ u Pyndap Syiemlieh da ong wa i yoh bordiñ ha ki thaaiñ Elaka Narpuh wa ki chnong wa marjan toh kawa thut bha hadooh kattæ kattæ wei da ktah ko chiboon wei da pynchong hei doom yaki paaid chong chnong yong ka thaaiñ, khamtam da ktah dooh ko ya ki khynnah kiwa dang em ha i puræ puthi wot ya kiwa pynemkaam bordiñ wa chiboon i emkaam ha ka pyrthai wa katni.
Ka seiñ da ong ko wa i dooh bordiñ khak khak ha thaaiñ ym toh du heipor wa ktah ka rymaw, wot haki por wa rang wa khooid ka pyrthai leh man ko iwa thut bait wei katkam wa man kattæ la 8 tylli ki chrot bordiñ wa da pat, 5 tylli haka chnong Umlong, ha Wahiajer 2 tylli, ha Mosianglamre Thymme uwi, wei ini i pat kini ki chrot bordiñ ka seiñ da yoh yutip na kiwa chong chnong hi wei da pyntip ki wa man-i-por da pynsñiaw wei kyrpaad ya kiwa toh u pait ka MeECL wow kylliang thymme noh neidaw wa kini ki chrot bordiñ toh kiwa da sap sarah lut tangwa ym em leh ki yeini wei da embhah ym em jia iwa sñiawsih.
Ka seiñ won da yoh ko wow yaklam wa uwi na ki wakreh Lineman ha ka thaaiñ hajrong ini uwa da pyntip wa katni hi chem jynjar bha wow pynyoh bordiñ wei wow chna rap smat hawa em i thut lane wa sih heiwon heiwon ka chnong leh neidaw wa em u du samen hi wot tang uwa bood leh ym em deiwa pyntip leh wot ka Control Room leh kawa em ha Lumshnong em du uwi.
Kamtæ neiliang ka seiñ da kyntu ko ya ki bor wa toh u pait ya ini i kaam wym toh u pynslem de wow chna smat ya ki chrot wa da pat wei wow pynboon chooh chooh ya ki Lineman yow lait na iwon iwon i jia wa sñiawsih.
