U MLA ka Congress na Mawlai u Process T Sawkmie da pynsñiaw u yei sñiawsih wa khroo hajrong i eh wa kiwa sikai SSA da maad ki neidaw i wym toh tulop da kiwa boon boon bnai.
Da ong uwa ini i hap mih cha sarok wow dawa yei hok yong ki da pynyoo wym em yei kitkhlieh yong ka sorkar kawa da leh thlah wei leh khlot yei eh yong ki, wot hawa da mih ki cha sarok man-i-por deilang wa ki Placard wa i kbai wow dawa ya ka tulop kawa toh i hok i yong ki.
Da ong u hanla wa ki kam kiwa sikai toh iwi na i kaam wa da burom da waroh ha kylleiñ ka pyrthai, tangwa sñiawsih won wa ha Meghalaya, ka sorkar ym em burom næ chim yei kitkhlieh neibynta wow pait ya i bha i biang i yong ki tangwa da leh thlah pathan yei eh kiwa sikai.
Da ong u leh wa kiwa boon kiwa sikai da ood ki wym jooh yoh tulop heipor wa biang, wei ini da booh hei eh chiboon ya ki neibynta wow pyndap pynbiang ha yung wa kiwi de kiwa emkaam kiwa boon khamtam ya kitu kiwa chong yung wai.
U MLA ka Congress da ong u leh wa najrong wa hap wow mih sarok, kiwa sikai du wow yoh ya ka tulop da hap ki leh wow yachem ya u Montri Rangbah næ ya u Montri ka chnat Puræ Puthi ka jylla, deiwa pynrap wa ka sorkar ka ong ko wym pu yoh poisa na Delhi wow su ya ka tulop kiwa sikai SSA tangwa iwa sakhiat hi kam ka bei u pa toh wow thooh ki laad ki luti kammon wow pynbiang yei dawa yong ki khon.
