U Waheh Chnong ka Umkiang, East Jaiñtia Hills District, u Lasting Pala da pynsñiaw u yei sñiawkhia wa joor hajrong i sih cha wa palat u sarok NH-06 uwa lai lyngba ka chnong Umkiang wei ini toh neidaw wa e laad wei pynlait ya ki Dumper Truck wa kit palat pood (Overload) ya u moochuni man-i-por.
Da pynbaad u wa ini da leh deiwa chim poisa wei bang tyngka na ki Truck wa kit Overload wei em leh ki wym biang ki kot ki sla.
“Da chem i ya ini i kaam pyrchah aiñ man-i-por wa u sahep ka chnat Forest da leh u kamni deiwa baam chiboon ka poisa. Kini ki Truck ym ye ki wow lai nakhmat ka yung krehkaam ka Forest khlem da yoh bor na uni u sahep wei da ini i baam-tooh uni u sahep da yoh ki Truck wa kit moochuni wow kit palatpood khlem em wa ksoh. Ini i leh uni u sahep da pyndooh nong ko yei yoh dan ka sorkar,” da ong u Lasting Pala.
Chooh chooh da ong wa ini i leh ym toh du wa man ko pyrchah ya ka aiñ tangwa da pynsih leh ya u sarok National Highway wei ini da ktah ko leh ya u paidbah. Da ong leh wa du ynne ka sngi da yoh wow ksoh 9 tylli ki Truck wa kit moochuni palatpood wa da pynlait da uni u sahep Forest.
U waheh chnong da kyrpaad wei da ujor u leh ha u Officer In-Charge Umkiang P.P. East Jaiñtia Hills District, wow pynngat ha ka aiñ wei wow pynchitom ya uni u sahep katkam ki aiñ sorkar.
