Ka Khasi Students’ Union Laskein Circle ha ka 30 tarik u Naisan da lai booh ujor ko ha u DM&HO ka West Jaiñtia Hills, u Dr. K.C. Ajar hajrong i duna Doctor ha ka Community Health Center (CHC) Laskein.
Neiliang u DM&HO da pynche u wa i daw wa duna Doctor ha katai ka CHC toh wa em uwi u Doctor uwa na Nongtalang uwa da dep thung kreh tangwa ymtip neiyi i daw wym em wan u yow sdang kreh ha katai ka CHC, kamtæ u DMHO da kular u wow yaklam wa ki bor kiwa haneiñ hawa yatoh wa ini i kaam.
Ka seiñ won da ong ko wa kani ka CHC toh kawa nadooh nachwa ym jooh biang Doctor ko wei ki kaam sumaar wa khian wa nai leh ha katai ka Hospital da phah ki wow lai rah cha Civil Hospital wa em ha Ialong wei ini da booh ko hei eh ya ki paidbah khamtam kiwa dooh wa duk.
Kamtæ ka seiñ da phah ko ya ka wyrta cha ki bor wa haneiñ lada ym ye ki wow leh yeiwa toh, ka seiñ daw lai won ko da kiwi ki laad ki luti.
