Ka yalang wa kyrpang wa da khut da ka All Jaintia Tourist & Commercial Vehicle Association (AJTCVA), ynne ka sngi heipor 10:30 i step ha Paradiso Conference Hall, Jowai yow yaklam heiyatoh wa i eh kiwa yah kari yachem ki kamjooh ki paidbah heiyatoh wa ka bai kari.
Ha kani ka yalang da wan lang kiwa boon ki seiñbhalang, ki kattu katni ngut ki waheh chnong, wa kynthup leh ya ki wakreh kaam yong ki Synjuk Waheh Chnong, ki khynnah skur wa ki bru paidbah kattu katni ngut.
Hadien wa u President ka All Jaintia Tourist & Commercial Vehicle Association da dep u wow batai yei eh kiwa yah kari nadooh wa ku dor ka dan (Tax) ki kot kari kamjooh i phniang kari, ka Association da pyrchang ko wow chim bai kari hapoh i dor wa booh ka sorkar.
Da ong u wa katkam i bai kari sorkar toh T. 18 chi kilometre, heiwa ka Association won da chim ko duna bha deiwa e nongmuna u wa lada man ko 32 Km hei dor T. 18 chi kilometre, ka bai kari man ko T. 144 samen katwa ka Association won phah chim bai kari ko hapoh ini i dor.
Ha kani ka yalang da yoh leh yei yaklam wa rap bniah bha wei da iwi i yumut da rai wow lai yaklam wa ki bor District kiwa toh wow pait ya i khia i chon yong ki paidbah ha West Jaiñtia Hills yow pyrkhat neibynta i eh wa yachem ki paidbah kamjooh kiwa yah kari.
Ha i lai ka Association deilang wa ki seiñbhalang chirup wa ki kattu katni ki waheh chnong wow lai yachem, ym em yoh laad neidaw wym em ki sahep sorkar ha ki thaw kreh yong ki neidaw wa dang lai ki cha ki kaam yong ki.
Kamtæ neiliang ka Association wa ki seiñbhalang wa ki waheh chnong da kyrpad ki ya ki paidbah wow sñiawbha wow neh chah wei wow yakrehlang chirup sa kattu katni sngi.
Hadien wa wan yachem wa ki bor wa toh wow pait ya ini i eh yong ki paidbah, daw e yutip won cha ki paidbah, pynkut ka kyrwoh na u Secretary ka AJTCVA.
