Shillong: Ka Confederation of Meghalaya Social Organisation (CoMSO), ynne ka sngi da pynbna ko ya ki yakhih wa ar sngi, wei ini i pteiñ i yakhih da ka CoMSO toh chibynta wow pynjoor ya i dawa wei wow pynbor ya ka sorkar India wow pynkrehkaam noh ya ka Inner Line Permit ha kani ka jylla, wei kamjooh wow pynbor ya u Lat wow e muhor noh ya ka Meghalaya Residents Safety and Security Amendment, 2019 yow man aiñ noh ko.
U Robertjune Kharjahrin uwa man leh u Chairman ka CoMSO, da pyntip u wa neiliang ka seiñ da rai ko wow yakhih ha ka 19 tarik uni u bnai, kawa man ka sngi wa dap chi snem wa ka Yung Dorbar Chna Aiñ ka jylla da mynjur ko wow pynkrehkaam ya ka ILP.
Da ong u wa i pynbna yakhih ha kani ka sngi toh yow beiñ yei wym mano ka sorkar India waroh chi snem wow pynkrehkaam ya ka ILP. Da ong u wa i yakhih ha ka 19 tarik da ekti bait ha i stat kiwa yahkhmat ka seiñ ha ki District.
U Chairman ka CoMSO da ong u wa kawi won ka yakhih wa da rai wow pynman toh ha ka 30 tarik uni u bnai kawa man ka sngi kynmoo warom ya ka sngi yap u Kiang Nangbah uwa man u khlawait, wei kani ka yakhih toh yow pynkhai im biang ya i mynsien yaleh yong ka jaitbru, wei ha kani ka sngi daw pynman yaka lai paidbah ha i por janmiet deiwa rah ya ki dongmusa.
