Wym mano ka sorkar yei dawa ki wakreh Mid Day Meal, mih paidbah ki yow dawa yei hok

Jowai: Hadien wa le bnai wa ka seiñ All Jaiñtia Muster Roll Workers & Labour Union deilang waka seiñ kiwa chet ja sngi næ ka All Jaiñtia Mid Day Meal Workers Union ym yoh ki kawon kawon ka jubab naka sorkar jylla wot hadien wa dep booh ki yaka dorkhat ha u montri rangbah u Conrad Sangma wow kyrpaad na oo wa naka sorkar jylla wow pynyoh yaki hok dawa yong ki kam ki wakreh wa khain tam ka sorkar, kamtæ ynne ka sngi da mih madan da i lai paidbah næ Rally nadooh madan Mihmyntdu ter ter u surok ka Ladthadlaboh, Iawmusiang, Mission Compound wei da pynkut ha madan Tpep-Pale, Jowai.

Da chim bynta ha kani ka Rally da ki spah ngut deiwa rah lang ya ki kot rben wa i kbai wow dawa ya i hok yong ki na u montri rangbah kamjooh na u montri rangbahdooh ka ri u Narendra Modi.

Haka yalang wa tbian wa pynman ha madan Tpep-Pale ki wakreh ka Mid Day Meal da kyntu ki yaka sorkar wow sñiaw wow ap ya i eh yong ki, neibhah wa i su wa du T. 30 chisngi ym yahap de wa ka kaam wa ki kreh ki.

“Waroh chi kattu i yang wei yooluti i wa ka sorkar daw yoo ko yei kreh chitom wa i eh i khoo yong ki, tangwa da yoo wa lada chirta i im yong ki leh u neh bait ko T. 30 lada neh hei yang wa i yooluti naka sorkar,” ong ka Lamjingieid Lapasam, General Secretary ka All Jaiñtia Mid Day Meal Workers Union.

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da ong ko leh wa na i daw wa khian palat i su, ki khon wapli leh ym ye u pyndap yeiwa emkaam ki.

U K.L. Pariat, President All Jaiñtia Muster Roll Workers & Labour Union, da ong wa ha i lai yachem wa u montri rangbah haka 03-06-19 da man ko kawa e kyrmen neidaw wa da kular u wow lai rah ya kani ka khubor cha u Narendra Modi tangwa hadooh ynne ka sngi ym em yoh jubab iyi iyi leh.

Da pyntip u wa i kyrpad yong ki toh wow pynku ya i su naka T. 1000 cha ka T. 5000 chibnai. Neitæ kam kiwa chet ja wa hap kreh ki nadooh dangstep hadooh janmiet, wei da dawa wa hawa chitom ki khon ki kti ki hadooh kiwa hayung hasem toh u e chuti ya ki kamjooh hawa yoh khon.

Chooh chooh i su leh toh u yoh 12 bnai kamwa yoh lang kiwa sikai ym toh du 10 bnai, nalor kiwi de ki dawa.

Hawa yatoh wa ini, ynnin ka sngi 12 tarik leh da lai booh sa yaka chithi pynkynmoo hajrong ka dorkhat wa da dep lai booh ha u montri rangbah u Conrad K Sangma.

Ynne ka sngi da chim leh yaka rai wow pteiñ yei yakhih kat wym pu yoh jubab naka sorkar.