U Montri Rangbah ka jylla, u Conrad Sangma hawa chimbynta hei yaklam hadien wa yieñ u MLA ka VPP, u Ardent Miller Basaiawmoit wow pyrchah yei klam u Lat dei ktien Hindi hapoh ka yung dorbar chna aiñ hadooh wa da mih leh waroh 4 ngut ki MLA ka Party napoh ka dorbar, da pynche u wa u Lat da dep u wow paan bor wow klam dei ktein Hindi neibhah wym tip u wow puræ wei klam dei ktien English.
Heijooh i por da ong u wa ini i klam u Lat (Governor’s Address) toh iwa da dep saam cha waroh iwa da thoh hei ktien English wei ha kam ini i por toh u burom ya u Lat wei ini wa jia ynne ym jooh em jia nachwa wei ini ym em pynyoo ko yei dur wa miat ya ka jylla kamjooh ya ka Meghalaya Assembly.
U Conrad da e nongmuna u wa lada u MLA hap lai u cha Delhi wei manda ong ki Montri ka sorkar ya oo wa lada ym ye u klam Hindi ym bien ki wow yaklam ya oo kammon u sñiaw u, lada lai u cha Tamil Nadu dep tæ ong ki ya oo ym hoi u klam English tangwa toh u klam dei ktien Tamil, kammon u leh u?
Da ong u leh wa ha waroh kawi ka pyrthai i eh wow sñiawthooh uwi ya uwi da em bait i tangwa wow ong wa iwa da jia ynne toh wow pynchlur yow klam da kawi ka jait ktien toh iwa bakla, wei toh u sñiawthooh wa i maya ya ka jaitbru, i burom ya ka jaitbru ym toh iwa bakla neibhah waroh maya i yei ktien yong idæ wa ya ki bru yong i tangwa ym toh won wa na ini i mynsien maya won u sdang i wow kynchiñ ya kiwi.
Heiyatoh wa i tipmit noh ya ka ktien Khasi wa Garo da pynkynmoo u wa da dep chim ya ka rai (Resolution) wei toh u ya krehlang yow poi cha ka thong.
Kamtæ da ong u yow pynbaad wa u Lat kwah u wow pynchlur yow klam dei ktien Hindi toh iwa bakla wei i wym burom ya oo kam u khlieh ka jylla wei da pynsih leh yei burom ka jylla deiwa pynthut ya u Lat heipor wa dang klam u.
U Conrad da pynche u leh wa heiyatoh won wa ki MLA ka jylla ym em khang ya ki wow klam ki hei ktien yong ki hi hapoh ka dorbar.
Hachwa ini neiliang u Symbood Montri Rangbah, u Prestone Tyngsong uwa man leh kam u Montri ka chnat Parliamentary Affairs da ong u wa toh wow pyndam noh yei klam u Ardent napoh ka Record ka Assembly.
U Ardent won da pynche u wa ym em kynchiñ u ya u Lat tangwa ym toh wow chah wow pynmyllien yeini wei toh u burom yeiwa thrang ki paidbah wow tipmit noh ya ka ktien Khasi wa Garo wei ileh chah wow phah ka sorkar da ki Lat wym tip u klam English.
Neiliang u Speaker ka Assembly, u Thomas Sangma da ong u wa ini ym toh i sien wa nyngkong wa klam ki Lat dei ktien Hindi hapoh ka dorbar neibhah u Lat warim u Ganga Prasad leh da leh u yeini i jooh wei da sñiawsih u wa da jia ini neibhah ye wow yakla yeini hadien ym toh deiwa pynthut yeiwa da klam u Lat, kamtæ da chim u ya ka rai wow pyndam noh yeiwa da klam u Ardent.
