U Prestone Tynsong da kyntait lut u yei pynbaad yong ka UDP wa toh oo wa seiñdur yow pynhaap ya ka Executive Committee yong ka UDA wa da yahkhmat da ka UDP ha Khasi Hills Autonomous District Council (KHADC).
Hawa klam ynne ka sngi, u Prestone uwa man leh u Symbood Montri Rangbah ha ka sorkar MDA-II, da ong u wa oo ymtoh u MDC wei ymtoh leh uwa da chah thung kam u MDC ha District Council, kamtæ kammon ka UDP u pynbaad ko wa oo toh i daw wa haap ka Executive Committee.
Hajrong i pynbaad yong u Titosstarwell Chyne wa toh i booh kyndon yong ki MLA kiwa lai psiah cha ka NPP yow pynhaap ya oo na ka chuki CEM, neiliang u Prestone da ong u wa ini i klam u Titos toh ye u man nei sñiaw chrai neidaw wym pdiang u yeiyi wa da jia wei ye u man wa iwa bakla toh i yong oo hi iwa da pynhaap ya ka EC ha KHADC.
Hawa yatoh wow thung MDC kam u Nominated MDC, neiliang u Prestone uwa man leh kam u Montri wa pait ya ka chnat District Council Affairs (DCA), da ong u wa i rai toh i yong ka Executive Committee wa thymme wei hadooh katni ym pu em iwon iwon i dak wow pynkylla noh ya u MDC uwa dei thung wa da ksoh da u Bindo M Lanong na ka UDP.
