Kiwa sikai hapoh ka chatri yong ka Federation of All School Teachers of Meghalaya (FASTOM) ynne ka sngi da lai ki wow yieñ yakhih hakhmat yong ka Secretariat, hadien wym yoh ki wow yachem wa u Montri Rangbah, u Conrad K Sangma hanla dadep ki wow pynbait por yachem (Appointment).
Ini i mih kiwa sikai Adhoc wow yakhih ynne ka sngi da man ko hadien i booddien yong ki ya ki dawa, heiwa da yoh yutip ki wa ka ‘File’ wa yatoh wa i dawa kiwa sikai da em ko katni wa u Montri Rangbah ka jylla.
Neiliang u Vice President ka FASTOM, da ong u wa lada kiwa sikai ym yoh ki wow yaklam lane u yachem wa u Montri Rangbah ka yakhih hakhmat Secretariat daw pteiñ biang mynstep ka sngi wei lada ka sorkar dang mutlop ko, neiliang kiwa sikai daw pynman ki ya ki Rally wa heh nadooh ka 12 tarik ha Shillong wa Tura.
Kam wow kdaw heini wa kiwa sikai skur Adhoc da dawa ki wow pynku ya ka tulop na ka T. 12,000 chi bnai cha ka T. 18,000 deilang wa i pynku 5% man-u-snem kam ka Increment, tangwa hadooh katni neiliang ka sorkar da pynsñiaw ko wa dang bichaar ko ya ini i dawa.
