Dei ya krehlang ki le ngut ki MDC wa kynthup u MDC ka Saphai u H. Dkhar, u MDC ka Barato-Mukroh u A. Shadap, u MDC ka Mynsngad-Khanduli u D. Lyngdoh, neitæ ki le Dolloi wa kynthup ya u Dolloi Elaka Raliang, u Dolloi Elaka Shilliang Myntang, u Dolloi Elaka Nongjngi chirup waka Hynñiewtrep Border Disputed Redressal Forum (HBDRF) da pynman ki ya ka yalang paidbah ha chnong Mukroh, West Jaiñtia Hills District haka 4 tarik uni u bnai hajrong ka thong wow wanrah i yatylli hapyrdi ki paaid wa chong chnong kiwa em haki chnong khappood wa ki chnong wa marjan, ki paaid Khasi Pnar wa sah hapoh ka Elaka Labang Nangphyllut wa Pangam Raliang kawa tip kam ka Block-I.
Ha kani ka yalang da emlang leh u Dr. H. Lamin, Ex-MLA yong kani ka thaaiñ, u Woh M.M. Thaiang Secretary ka Labang Nangphyllut Pangam Raliang Council, u J. Lyngdoh, Education Secretary KSU Jaiñtia Hills, u R. Lamare, President HYC Jaiñtia Hills District, u T.R. Suchen, Secretary JSU Central Body, u C. Ryngki, Vice President HNYF West Jaiñtia Zone, ka R. Shylla, President JWAM, u C. Sungoh, Chairman-HBDRF ki waheh chnong naki chnong waphær waphær deilang wa ki paidbah wa boon.
Ya ka yalang da pynlai da u A. Shadap, da yoh i klam pdiang na u H. Sumer, waheh chnong Mukroh Pyllun, da yoh i klam na kiwa yahkhmat seiñbhalang kam ka HYC, KSU, JSU, HBDRF, na u Dr. H. Lamin, na u Woh M.M. Thaiang wa ki waheh chnong waphær waphær ka Block-I.
U Woh M.M. Thaiang hawa klam da khana u yaka parom wada jia sakhiat haki phaw snem nachwa ha u snem 1972 heiwa ka sorkar Assam chwa u pynbna ya ka jylla Meghalaya kam ka jylla wa pura, neiliang ka Assam da wan seh moopood yabor ko tymbud ki chnong khappood nadooh naka chnong Mokoiram hadooh chnong Psiar.
Da khana u wa ki pulit Assam da kem ki ya oo deilang wa ki bru waheh wei da rah ya ki cha patok Nowgong du neidaw wa pyrchah ki yei leh ka sorkar Assam.
Da klam che haroh u wa i kaam pood heiyatoh waka Block-I wym toh de u haap ko haka thup yakajia pood tangwa sa du u pynuiñ noh (Re-transfer) katkam wada dep sylli lang da ki ar tylli ki District Council ka United Cachar & Mikirs Hills District waka United Khasi &Jaiñtia Hills District yeiwa da leh katkam ka hukum yong ka sorkar Assam kawa da sdang nadooh ka 17-02-1958 na Umbaso wei da pyndep won ha Jrikyndeng haka 23-02-1958, heiwa da em leh i thoh i tar wa ki sakhi wa biang.
Ong haroh u wa lada ka sorkar Assam waka Meghalaya ym burom ki yei yi wa da leh ki dei wow pynuiñ biang ya kini ki thaw, kamtæ lada jia wa mih iyi iyi ka sorkar toh u chim ko yei bahkhlieh.
Chooh chooh ong u wym toh u chna i ya kajia tangwa toh u chna noh daka Non-cooperation Movement yow sangeh noh chisyndon u chim wei pdiang yaki Scheme, ki Grant na ka sorkar Assam, deiwa kyntu wei kyrpaad ya ki para chong chnong wa em ha Meghalaya kiwa sah ha ki thaw khappood u man ki kiwa ya maya wei yarap kylliang ya ki pradoh prasnam wa em chapoh Labang Nangphyllut wa Pangam Raliang.
Da pynkynmoo haroh u wa ha u snem 2003 heipor yut chnong ki Labang Nangphyllut ha Sahkhwe (Sahsniang) u Dr. D.D. Lapang, Chief Minister ka Meghalaya wa u Rouponsingh Ronghang, u MLA ka Assam da kular ki u pynuiñ noh ya kini ki thaw cha Meghalaya, wei neitæ i daw kini ki bru smat ki u li uiñ biang cha ki chnong ki thaw yong ki.
Uwi u bru waheh u wym kwah u khana pyrtuid ong u i daw wa pyrchah ki paaid Khasi Pnar u em chapoh Assam toh hajrong ka yurim yong ka khyndaw ka chyiap, i ktien i thylliej yong ki bru wa chong wa sah haka, i rukom e kur, ka niam ka rukom waka riti ka dustur, ong haroh u wa lada ki ar sorkar ym ap ki yeini ym yohsa ki wow ujor cha ki bor ka aiñ.
Da iwi i sur waroh kynthai wa chynrang kiwa em ha kani ka yalang da rai ki u yieñ bait hajrong ka yurim u dawa naka sorkar wow pynuiñ biang yaka Block-I cha Meghalaya wei wow lai e dei thoh cha u Chief Minister yong ka Meghalaya hajrong kani ka phang.
Kani ka dorbar da kyntu wei kyrpaad haroh ko ya ki Regional Committee yong ka Meghalaya wa toh u kynthup lang leh yaka JHADC, ki Dolloi, ki waheh chnong, kiwa yahkhmat, ki seiñbhalang wa ki bru waheh kani ka thaaiñ hapoh ka Regional Committee wei u lai hiar pait sylli leh chadooh ki chnong wa em heibynta wa khaddooh tam i thaw yakajia pood.
Da kyntu leh ya ki paaid wa chong chnong ki thaaiñ khapood waroh u pynbiang lut ki ya ki Patta ki Land Holding Certificate hapoh JHADC kawa da tyrwa mynkna wow yoh leh Registration.
Kiwa klam neiliang kiwa yahkhmat seiñbhalang waroh da pynsñiaw ki kawi don ka sur wow yieñ tylli u yakrehlang kam kawi ka jaitbru neibynta u pood u ang. Ki waheh chnong na ki chnong waphær waphær ka Block-I leh pynsñiaw ki yei sur wa kwah ki u em bait cha Meghalaya wei kyrpaad leh ya ka sorkar Meghalaya u chimkhia bha ko heiyatoh u pynbait smat ya u pood u ang wa ki thaw waroh toh u wan ko cha Meghalaya.
Kani toh katkam ka khubor wa da phah da u Chandame Sungoh.
