U General Secretary yong ka seiñ Khasi Students’ Union (KSU-CEC), u Donald V Thabsh da klam pyn-eh u ya ki pulit wei wa da kylli u leh iyi mut yong ka chnat pulit kiwa da lai thooh ya uwi na kiwa yahkhmat ka KSU South Khasi Hills, u Ribok Diengdoh.
Da ong u leh wa ynnin ka sngi, ki dkhot ka KSU da lai toor ki cha thanat Sohra, deilang wa kitu kiwa chah kynreh na yung ha ki pulit, tangwa iwa sñiaw lyngngoh dooh toh wot kitu ki dkhot kiwa da chah thooh næ kiwa chah kynreh ha ki pulit da lai wei da poi lang ki hadooh thanat, kamtæ weileh wym kem ki ki. Neibhah ya u Ribok da lai thooh ki oo na yung u hapyrdi i miet i synyaaw katwa ynnin won ka sngi da lai lang wa oo cha thanat ileh wym won ym kem ki oo?
U Donald da kylli u yaka chnat pulit wa lada i thmu yong ki pulit toh wow kem næ wa em ki i thmu da kamwi tawon. Da ong chooh chooh u wa ka sorkar wymtoh u pyntyrha ko næ u pynsaja chooh chooh ko ya ki dkhot ka sieñ, neibhah lada dang ptieñ bait ko yeini, ka seiñ ym chong suki hi-eh ko wei daw chim ko da ki luti kiwa ye u pyntyrha kylla ya ki bor sorkar.
Ynne ka 4 tarik toh ka sngi wa ka KSU da jooh kynmoo burom ko kam ka sngi kyrsu thiah ya ka ri ka jaitbru yong i kawa tip kam National Awakening Day wei ha kani ka sngi ka seiñ da wah ko ya ki Banner wow dawa na ka sorkar wa toh u pynlait noh ko ya kitu ki ar ngut ki dkhot ka sieñ kiwa da chah kem ha ki pulit hajrong i suba wa em kti ki wow pynyap ia ki ar ngut ki Dkhar ha Ichamati.
Ha kawi won ka liang, u Donald da ong u wa ka seiñ wym em de sñiawphylla ko yei chah kem ki dkhot ka seiñ, neibhah lada em i wan iwon iwon i kajia, ki wow chah kem nyngkong toh ki dkhot yong ka KSU bait.
Da ong u leh wa lada em i tyngkhooh hapyrdi ki baar jylla wa ki Khasi næ lada em i ya kajia para baar jylla leh, i kdaw kti wa nyngkong dooh toh ya ka KSU, wei da pynrap u leh deiwa ong wa ymphær hanla da man kamtæ leh.
Discussion about this post