Ka Yung Dorbar Chna Aiñ da chit bha ko ha ka kynta kylli wei jubab, heiwa u Chief Whip ka Liang Pyrchah, u George B Lyngdoh da wanrah u yei yukylli hawa yatoh wa i kaam pynbait pood wa ka jylla Assam.
U George da pynsñiaw u wa i pynbait pood ha ka kylla kawa ar ym toh de wow man kam ha ka kylla kawa nyngkong, khlem da yasyllok lang wa kiwa embynta wa kynthup ya ki tre thaw wa kiwa synchaar chnong, iwa da pynman leh wow mih i pyrchah yei dooh mynkna ya ki thaw yong kiwa chong chnong.
Hajrong ini i klam yong u MLA ka Liang Pyrchah, neiliang u Montri Rangbah ka jylla, u Conrad K Sangma da ong u wa i klam yong u George toh iwa thok wei wow yahbkla ya ka yung dorbar, heiwa da ong u wa u MLA ka Liang Pyrchah toh u kiar ko na kam kitai ki klam wa yahbakla.
U Conrad da ong u wa i pynbait ya u pood u ang ha ka kylla kawa nyngkong, ka sorkar da dep ko wow kynthup ya waroh kiwa embynta wei da pynman leh ya boon tylli ki yalang, tangwa dang ye u em ki wym hun yei pynbait pood.
Hawa yatoh wa i yukylli wa da wanrah da u MLA ka AITC, u Conrad da ong u wa heiyatoh wa i yaklam neibynta wow pynbait ya u pood u ang wa ka Assam ha ka kylla kawa ar da sdang ko, wei hawa jubab chooh chooh ya waroh kiwa embynta kiwa ym pu em yasyllok katni, da ong u wa i yaklam dang lai wei katwa dang lai i yaklam i ya syllok leh daw sdang wa waroh nadooh ki seiñ, kiwa synchaar chnong wei kamjooh ki District Council.
