Kattu wa da sdang yoh bor wow tih mooyong hapoh ka jylla Meghalaya, iwi iwa dang sahteiñ toh yow tlep (Reclamation) noh ya ki krem mooyong kiwa da dep tih kiwa da ieh donhi kamtu khlem leh iyi iyi, heiyatoh wa ini hawa yoh u Wyrta u yaklam wa u Montri Rangbah ka jylla, u Conrad Sangma da ong u wa i rukom tih mooyong nachwa cha i rap phær i hawa nujor cha kiwi ki thaw ka ri.
Kamtæ yow leh yeini daw hap pynemkaam dei stat iwa rap phær wei iwa suk dooh wow sñiawthooh yeini toh wa hap wow pyndap khyndaw ya waroh kiwa da dep tih yow pyntikna wym em iwon iwon leh iwa liat kiwa daw poi cha ki um ki wah, da ong u Conrad.
Da ong u leh wa daw hap wow pynim ya ki um ki wah kiwa da chah ktah, u thung ya ki dieñ yow man biang kam nachwa wei kini waroh da e kti wow leh da ka Central Mine Planning and Design Institute (CMPDI) kawa man ka chnat krehkaam ka sorkar India kawa da pliah bha ya ini i kaam.
Tangwa da ong u wa da pyntip ki wa daw emkaam ki wow leh chwa yei thooh bniah neibhah wa phær i rukom tih marpohkhyndaw hawa nujor wa kiwi ki bynta ka ri wei hadien wa pyndep yeini daw ya krehlang ki wa kiwi ki chnat lane ki bru wa chemphang heiyatoh wa ini i kaam kammon wow lai chakhmat.
Chooh chooh da ong u wa kammon wow pyndap ya kini ki krem mooyong, du kitu donhi kiwa tip chaphang ini i kaam wa ye u ong kammon u leh kamjooh yow tip leh u jied ya kiwon kiwa ye u leh ya ini i kaam.
Da pynkut u deiwa ong wa ka sorkar em ko ya ka poisa wei i angnood wow leh noh yeini yow pyntikna wa da ye wow leh yeiwa emkaam.
