Khliehriat: Uwa yahkhmat ka Joint Action Forum (JAF) yong ki soo tylli ki seiñbhalang wa kynthup ya ka Southern Border Youth Welfare Association (SBYWA), Jaiñtia Student Movement (JSM-ER), Jaiñtia Youth Federation (JYF), North East People Indigenous Federation-South Eastern Border Region(NEIF-SEBR) u S. Rymbai uwa man kam u Chairman yong ka JAF, uwa man leh u President yong ka Jaiñtia Student Movement-Eastern Region (JSM-ER) da chah maham chah dat u ha uwa yahkhmat yong ka Federation of Khasi Jaiñtia Garo People (FKGJP-Pynurkba Unit), neidaw wa pyrchah joor ka JAF yaka karkhana (Coke Plant) kawa em ha Wah Deiñling kawa em hapoh ki soo chnong hapoh ka Elaka Rymbai.
U S. Rymbai hawa yaklam wa uwa thoh khubor, da ong u ki soo tylli ki seiñbhalang deilang wa ki soo chnong da jied ki ya oo kam uwa yahkhmat yaka JAF iwa pynyoo wa em ki i chaniah ka yong ki ya oo deiwa jied ki ya oo kam u Chairman yong ka JAF, kam chibynta wow pyrchah ya katai ka karkhana (Coke Plant) kawa em ha wah Deiñling.
Da ong u leh deiwa em katai ka karkhana daw ktah ko yaka rep ka riang, yaka la-ær wa ya i chait i nang kawa daw pynmih chiboon ka la-ær wa sih wei daw ktah ko leh ya i rep i riang yong katai ka thaaiñ.
Da ong u leh wa kam uwa yahkhmat yong ka JAF deilang wa ka JSM-ER, ym kynran dien lada klam næ pyntieñ ki ya oo neidaw wa u Blai ym ieh u ya oo, deilang waki dkhot yong ka JAF wow pyrchah bait ya katai ka karkhana, kamwa da smai u wow yap wow im neibynta ka jaitbru, wei u yaleh bait u neibynta wow neh wow sah ka pateiñ ka jaitbru.
Chooh chooh da ong u leh wa da tip che u ya kitai ki bru wa maham dat ya oo deiwa kam toh uwa yahkhmat yong ka seiñ FKJGP-Pynurkba Unit, da ong u leh lada smat u wow yaklam yasuk, neiliang yong oo leh smat u wow pdiang ya i yaklam yasuk, khnang wow lait u mih i kulmar hadien habood khnang wow chong suk chong saaiñ ka jatbru.
