Ka Boundary Committee yong ka Dorbar Chnong Ialong waka Dorbar Chnong Tuber Chohchrieh hadien wa duna chi snem pura nadooh ka 28-05-22, ynne sngi da yoh ki wow khait ya u soh wa thiang i kreh chitom kani ka Committee pynbait pood kini ki ar chnong wa da khlieh da u Chairman, u Juhhi Pale na ka chnong Ialong kamjooh u Secretary ka Boundary Committee u Kalbinus Rymbai na ka chnong Tuber Chohchrieh.
Na ka Dorbar Chnong Ialong da yahkhmat da u Waheh Chnong ka Ialong, u T. Ram Phawa katwa na ka Dorbar Chnong Tuber Chohchrieh da yahkhmat da u Waheh Shnong yong ka, u Lar Bang wei deiwa ya mynjurlang waroh arliang ha ka Boundary Committee, dapoi ki cha ka bynta wa da pdiang hun mynsien ki yei pynbait pood hapyrdi kini ki ar chnong.
Kamtæ ynne ka sngi neiliang kini ki ar chnong dapoi ki cha ka yasoi soskular MoU (Memorandum of Understanding) ha ka yung krehkaam u Pa Dolloi ka Elaka Jowai kamjooh da pynskem ya ka muhor yong ka Elaka katkam kani ka soskular kini ki ar chnong heijooh i por da kdaw ya ki bynta yong u pood yong jar jiar ka chnong.
Kani da man ko ka nongmuna wa bha ya kiwi tawon ki para chong khang yow ye u wanrah yei chongsuk chongsaaiñ ha ki chnong kamjooh ha ka ri waka jaitbru Pnar.
