Ynne ka sngi ha ka yakhih chong kyllaiñ myngngor namo ka Sit In Demonstration wa da pynman ha Iawmusiang, Jowai hajrong ka yurim u dawa pynkylla thymme yaka bhah thung kreh hapoh ka jylla namo ka Reservation Policy, uwi u bru wa tip pyrtuid kam u C. Roy Laloo katwa dang e yei klam u ha kani ka yakhih da yaam kthang u nadooh mynsien hawa kynmoo ya u Ardent Basaiawmoit uwa da chong chah thngan la chi tayaw kattu ha Shillong hajrong kani hi ka jooh ka mat dawa naka sorkar.
Hawa klam ong u, “Wym em wan i na kawon kawon ka seiñ saiñhima tangwa wan i hajrong ka yurim ka daw bah yong ka pateiñ ki khon ki kti yow yoh ki yaka hok bhah kreh”.
Da kyntu haroh u ya ki paidbah kamjooh ki seiñ waphær waphær u yatylli ki wym toh u ya jæd ya pra hapyrdi i wan tlep ka umsoo khnang wa ka jaitbru u im ko.
“Ka ri Khasi Jaiñtia toh ka ri tipbru tipblai tangwa kiwa mihkhmat yong i won wym em de ki ka mynsiem tipbru wot hawa boon u paidbah da pisa lang-a u wow yoh yaka hok,” ong u C. Roy Laloo.
Hawa kynthah ya ki MLA ong u wa da wan kular phi cha u paidbah heipor Election yow pynim yaka jaitbru, tangwa katni won yada phi du yaka chuki wa chong phi ym yaka jaitbru.
“Kynmoo u Blai daw tim u phi la hadooh kat deini u lehbeiñ phi yaki khon ka jaitbru”.
Ya kani ka yalang da khut pynman daka Jaiñtia Coordination Committee for Reservation Policy (JCCRP) kawa kynthup yaka seiñ JSM, JYF, EJNC, ka Synjuk Waheh Chnong Ri-loom Jaiñtia, Synjuk Waheh Chnong Jowai, wei da wan u ya ksohktilang da ki manbei manpa, ki khynroo khyllood wa lai puræ, ki seiñ waphær waphær wa kiwi.
Wei najrong i klam kiwa yahkhmat ka JSM, JYF, EJNC, ka Synjuk Waheh Chnong Ri-loom Jaiñtia, Synjuk Waheh Chnong Jowai da yoh leh i klam na u K.L. Pariat wa chong chnong Jowai, u Refing Lamin naka thaaiñ Nartiang, u Pyndap Muksor naka thaaiñ Mowkaiaw wa kiwi kiwi.
