Jowai: Deiwa sñiawkhia yei eh i kho kiwa chong wasah haki thaaiñ khappood Meghalaya-Assam neidaw wa sahteiñ i pynbait pood hapyrdi ki ar tylli ki jylla ka Assam waka Meghalaya, heiwa i pynthut pynwit ka sorkar Assam ya kiwa chong wasah ha ki khappood jia ki neipor cheipor, kamtæ ki kattu katni ki bru wa em i bahkhlieh neibynta ka imlang sahlang yong ka jaitbru da pynman biang ki yaka ya chemlang ha kani ka 27 tarik ha Circuit House, Jowai.
Ha kani ka yalang da emlang kiwa chong chnong kam naka chnong Khanduli, Lapangap, Lumlakhiat, Umchangiar, Namdong, Barato, Saba, Moojem, Psiar, Sahsniang, Mooshrot, Mowkaiaw, Iooksi wa kiwi kiwi ki chnong, nalor kiwa yahkhmat naki seiñ kreh mon sñiawbha kam ka HYC (JC) JSM-CB, HNYF, STIEH –CB, AHPUF-CB, MPYC-CB wa kiwi.
Yaka yalang da pynlai daka Purity Phawa deiwa booh chwa ya i ngooh Blai wei da yoh yei ktien yahkhmat na u Chandame Sungoh.
Hadien i phyllu yumut da rai wow thooh yutip chwa lyngba ki kot ki sla heiyatoh wow pood u ang ka Meghalaya nadooh nachwa ka snem 1951-52 wa haka snem 1971-72. Heiwa deiwa yoh yaki kot ki sla kam ki sabut, yow dawa naka sorkar Assam namo ka sorkar India wow pynuiñ noh yaka Block-I wa Block-II cha Meghalaya kam waman nachwa ka snem 1951 wada pynhap yabor cha United Cachar & Mikir Hills District.
Da chim leh yaka rai wa waroh kiwa ya emlang ha kani ka yalang u man chwa ki kam ki Conveners wow pynkhreh yaka yalang kawa rap heh ka wow man biang ha District Library Mynthong ,Jowai West Jaintia Hills District haka 24 u Naikhynde heipor 10:30 i step.
Kamtæ ha katai ka yalang wa bood daw jied ya kiwa yahkhmat yong kani ka yakhih paidbah, ka Committee namo ka Movement ki wow yah luti kyrpang heiyatoh wow pood u ang ka Meghalaya-Assam.
Da pyntip leh wa kani ka Committee ym toh u khleh Politics ko wei man ko kam ka Non-Government Organization ka wow yakhih wow pynbait ya u pood u ang.
Also Read: Sdang yachem ki kattu katni ki waheh wow kreh neibynta u pood Meghalaya-Assam
Discussion about this post