Jowai: Ka All Jaiñtia Youth Welfare Organisation (AJYWO)- Central Body, da booddien ko ya ka Trading Licence wa ka Non-Tribal Employees Service Licence hapoh ri-loom Jaiñtia, ynnin ka sngi heiwa da yachem ko leh ya u CEM, ka JHADC, u Madonbai Rymbai, wei da ekti leh ya ka dorkhat wow dawa kynreh ya ki Trading License wa Employment Service License.
Ha i yachem ya u CEM ka JHADC, ka AJYWO, hapoh i yahkhmat MH Dkhar, President wa u Reachingson Siangshai Vice President, da dawa ko na u CEM ka JHADC wow pynkrehkaam pura noh ya ka ‘The Jaiñtia Hills Autonomous District (Trading by Non-Tribal) Regulation (Act)-2011’ wei wow kynreh ya ki Trading License wa ESL kamjooh leh pynchitom ya ki katkam ka aiñ.
Katkam ka yutip lyngba ka RTI, em du 321 tylli ki Trading Licence kiwa dang krehkaam na ki 2785 tylli wei ini i duna ki Trading License ha ri-loom Jaiñtia Hills da pynphylla ko ya seiñ hajrong ini i yoh thiah ka JHADC.
Ha ka dorkhat ka seiñ da ong ko wa i wym krehkaam ka JHADC wow pait yei wan khayi ki baar jylla ha ri-loom Jaiñtia da wanrah i ym du yei dooh nong ka Council tangwa booh ko leh hei maa ya ka khayi pateiñ, i yoh wa i man chngaaiñ ki khian paaid.
“Ym kwah i wa ka Jaiñtia Hills u man ko ka thaw chim kabu ki baar jylla, du nei wym pynkrehkaam pura ka JHADC ya ki aiñ kiwa toh u kdoh u khoom ya ka kamai ki baar jylla heini”, da ong u M H Dkhar, President ka AJYWO Central Body.
Da dawa ko na ka Council wow chimkhia ko hajrong ini wei wow pynchitom ya kiwa leh pyrchah ya ki aiñ ka Council wei ka poisa wa mih hi daw yarap ko ya ka ha kiwa boon ki liang khamtam ha i wow su tulop.
Discussion about this post