Jowai: Ka Lapangap Khanduli Border Area Joint Action Committee ynne ka sngi da lai yachem ko wa u Deputy Commisioner ka West Jaiñtia Hills District hajrong i pteiñ chna sarok ka sorkar Assam na Tahpat lyngba ka Lapangap Khanduli wei kamjooh u pynkynmoo yei thoh wa da dep e ki cha oo nadooh ka 16-10-2019, deiwa ong ini i chna sarok toh i thombor yei hok u paidbah neibhah boon ki thaw da chah pynjæd pynpra iwa da ktah yei khih i khan wei jakpoh ki bru ka thaaiñ, heijooh i por kyrpaad ki leh ya u DC wow yaklam u waka sorkar Assam wa toh u sangeh noh i pynkreh ya kani ka sarok.
Heiyatoh wa ini, neiliang u DC u Garod LNS Dykes da khana u wa nadooh ynnin u snem hadien wa wan ujor ki, neiliang yong oo da phah u yaki wow e yei pyrtuid ki bru kamjooh ki kot pata khnang yow pyntip u cha ka Assam wa emkaam u yohbor naki tre thaw neidaw wym em mynjur ki. Ong u wa yeini i kaam da ekti haka BDO Thadlaskeiñ Block ka B. Blah kawa man leh kam ka Border Magistrate wei neiliang yong ka leh da booh por ko yaki u wan e ki yaki kot ki sla tangwa ym em wan ki.
Ong u wa katkam i yakut hadooh kamwa man hapyrdi kini ki ar jylla toh wow em i ya pyntip mar kylliang hawa thmu u wanrah ya iwon iwon i kaam pynroi neibynta i myntoi u paidbah la toh wa leh daka sorkar Meghalaya næ daka sorkar Assam. Lada ong wow pynsangeh won yei pynkreh toh u em ki daw wa biang hajrong i wym em mynjur ki tre thaw.
Hawa kylli won wa em hi mo i pyntip heiyathoh i pynkreh ya uni u sarok, khana u wa da mut u wow e dei thoh da oo tangwa sahteiñ noh neidaw wym yoh yaki kot ki sla yong ki tre thaw. Chooh chooh ong u wa hadooh kamwa man kattæ dang em i ya burom kylliang hapyrdi kini ki ar jylla neibhah cha kiwi won ki thaw wa em i pynkreh sarok, i pynkreh yaki skur man hi ko kawa lai dei ya sñiawthooh yumut wei mynjur ki paidbah.
Neiliang u Chairman ka Lapangap Khanduli Border Area Joint Action Committee u Pyrkhat Myrphet won da kyntait u deiwa ong wa neiliang ki bru wa chong chnong katai ka thaaiñ da dep e ki yaki kot ki sla tangwa ki bor District won pynslem ki.
Ong u wa neiliang ka Committee pynsñiaw ko i pyrchah joor hajrong ini i wan pynkreh sarok ka Assam deiwa pynbaad wa toh i chna pyrchah yaka aiñ næ i thombor. Kamtæ da kyntu u leh yaki bor wa toh u pait wow booddien wei u pynsangeh syndon yei pynkreh neibhah kam kiwa chong chnong katai ka thaaiñ ki sier mynsien ki wei em ki hapyrdi i doom buit ya boi em iyi re iyi i thmu wa cha lyndet ka Assam.
Da pynkynmoo haroh u wa ha u snem 2019 heipor waka chnong Lapangap da pyrchang ko du kat u pynchna (Repair) yo u sarok wow lai cha Khanduli, ki bor ka Assam da wan hiar ki wow pynsangeh. Kamtæ pynsñiaw u yei phylla wa ileh lada kreh da i, emkaam u pyntip katwa ki won wym em pyntip ki.
Ha kani ka sngi da emlang nadooh u General Secretary ka Lapangap Khanduli Border Area Joint Action Committee u Balajied Ksiar nalor ki dkhot wa kynthup ya u L. Laloo u Telme Dkhar wa kiwi.
