Ka Deputy Commissioner yong ka East Khasi Hills District, ka Isawanda Laloo da ong ko wa i yaklam wa ki kynhun yong kiwa yah kari kamai toh hajrong ka yurim yong ki dawa wa da phah da ka Meghalaya Joint Action Committee of Commercial Vehicles (MJACCV) hajrong ka phang wa ki kwah ki wow pynbait thymme noh ya i dor bai chong kari.
Da pyntip ko wa toh hajrong kani ka phang wa ka yung krehkaam da yoh ko yei kyrpaad, wei ynne ka sngi da khut wow yaklam ya ki kynhun kiwa yah kari kamai, deiwa pynrap leh wa hawa yatoh wa i pynhiar dor ya i Petrol wa Diesel, ka sorkar jylla ka da dep ko wow pynbna wei kiwi ki dawa leh chong ha ka sorkar jylla.
Ha i jooh i por ka DC da ong ko wa ki bor pynlai District toh kiwa smat wow khut, wow ap u sñiaw wei wow ya phyllu yumut yow yoh ya i ya krehlang ya ini i bynta neibhah i sangeh kamai yong ki kari da ktah palat ko ya ki paidbah, wei toh du lyngba i yaklam sñiawthooh yumut u ye wow pynbait ya i eh.
Ha iwi won i liang, ka DC da ong ko wa kamwa man katni, kiwa boon kiwa yah kari ym sñiawthooh bha ki ya i dor kari wa da pynbna daka sorkar ha u Duyatra (Jan) 2020, wei wow lai da ini i dor, wei neiliang yong ka da phah ko ya kiwa yah kari wow pynbait wa u DTO hajrong i dor bai kari, wei lada i kwah wow pynku dor toh iwa biang wei ym ktah ya ki paidbah wa chong kari, neiliang ki bor District daw phah ki ya ini i tyrwa cha ka sorkar jylla yow yoh yei mynjur.
