Ka Hynniewtrep Youth Council (HYC) East Jaiñtia Circle, hapoh i yahkhmat u Vice President u Michal Chyrmang, u President u Precious Pale, General Secretary u Arki Lamare deilang wa ki dkhot, ynne ka sngi da lai yachem ki ya u Deputy Commissioner ka East Jaiñtia Hills District u E. Kharmalki neibynta wow yoh yei che wa i sakhiat hajrong i ya kajia hapyrdi kawi ka manbei kawa da pynbaad wa chah kyntait chnong ha ka chnong Lama kawa em ha East Jaiñtia Hills District, du na i daw wa thooh yutip ko lyngba ka RTI hajrong ki Scheme waphær waphær kiwa wan lyngba ka sorkar.
Ha kani ka yachem, neiliang u DC da pynche u wa neiliang yong oo da dep u wow klam wa kiwa pynlai chnong ka chnong Lama, heiwa da ong u wa neiliang yong ki kam ka chnong ym em iwon iwon i kyntait chnong næ beh chnong ya katai ka manbei kamjooh leh hawa yatoh wa ki Scheme kiwa da paan pynche da katai ka manbei, dang sahkut ki hapoh ka yung krehkaam yong ka Block.
Chooh chooh da ong wa neiliang yong oo da chimkhia u ya kani ka kaam wei da phah leh da ka Magisterial Inquiry khnang wa iwon iwon iwa sñiawsih ym jia hapoh ka chnong ka thaw.
Neiliang yong kiwa yahkhmat ka seiñ da sñiawngooh ki ya u DC wa chimkhia u ya kani ka kaam, neibhah neiliang ka seiñ kawa pait ya i bha i miat hapoh ka imlang sahlang ym kwah ko kiwon kiwon ki kaam wa sih næ ki kaam ya pynbaad u mih ki hapoh ki chnong ki thaw yong ka District hi waroh kawi, ka seiñ da kyntu ko leh ya ki bor wa toh u pait wa ym toh u pynslem ya ka takit hajrong itai i jia wei toh u pynchitom katkam ka aiñ ya kiwon kiwon kiwa lai lait ya ka aiñ.
