Ka HYC War Jaiñtia Circle hapoh i yahkhmat u President u Yoodahunki Shylla da lai booh dorkhat ki ha u Superintendent of Police, West Jaiñtia Hills u Lakador Syiem hajrong i thut ka chongkuk chongsaiñ ki paidpah ka War Jaiñtia. U Publicity Secretary u Riki Mukhim da pyntip u ha u SP wa katkam wa man kattæ ha War Jaiñtia da jia chiboon ki kaam thombor kiwa da pyn chongsyier ya ki paidpah ka thaaiñ haddooh wa ki paidbah ym nood de ki wow khana yeiwa jia sakhiat.
Ka seiñ da lai yachem ko leh ya u sahep wa pait yaka Jowai Municipal Board hajrong wa mih i sma na i thaw noh jhep hajan wah Mynkjai kawa ktah ya i chait i khiah ki paidpah wa kiwa lai wa wan wei da dawa leh wow kyrriah noh ya kani ka thaw noh jhep, heiwa da yoh jubab ki wa ka chnat kular ko wow chimkhia wow pynkhooid ya katai ka thaw noh jhep daka pooh chi loom haka sngi nyngkong. Heiyatoh won yei dawa kyrriah yaka thaw noh jhep da pyntip wa na ki por cha ki por da yaleh chitom wow pynsñiaw cha ki bor wa haneiñ wow thooh thaw kawa yahap wow noh jhep kam wa da dawa i por.
Hadien ini da lai booh dorkhat cha u sahep ka MeECL ka West Jaiñtia hajrong wa boon na ki chrot bordiñ da jan oor ki iwa booh yei maa yaki paidbah ka thaaiñ. Chooh chooh u President da pynsñiaw u yei tlor ki sainar bordiñ kiwa em hajan ka Nongtalang Govt. Secondary School iwa booh yei maa yaki khynnah skur. Neiliang u sahep da kular u wa mynstep ka sngi daw phah ya ki bru yong oo wow lai pynbha ya kitai ki sainar bordiñ ha Nongtalang.
Discussion about this post