Ka Joint Action Committee, kawa kynthup ya ka East Jaiñtia Hills Truck Owners and Transporters Association waka East Jaiñtia Hills Limestone Suppliers Owners Association, hapoh i yahkhmat u Secretary yong ka, u Deolangki Dkhar wa u Adviser, u Adv. K. Ksoo, ynnin ka sngi deilang wa ka dorkhat da lai yachem ki wa u Deputy Commissioner wa thymme yong ka East Jaiñtia Hills District, u Shivansh Awasthi, hei wow yaklam wa oo hajrong i sih palat yong u sarok NH-6, khamtam ha ki thaaiñ ka Elaka Narpuh nadooh Lumshnong hadooh Malidor wei kamjooh leh hajrong i em i maa ya ki sarok, ki yingkieñ kiwa ha em ha u sarok NH-6 kam ka yingkieñ Sunapur wa kiwi tawon ki yingkieñ kiwa em ha ka ki sarok kari hapoh yong ka District.
Hei yaklam yong ka JAC wa u Deputy Commissioner, da pynap pynsñiaw ha oo hajrong i eh i khoo yong ki paidbah wa lai wa wan lyngba yong u NH-6 wa neidaw i man i long wa yoo chyrkhei wei i daw wa sih palat uni u sarok toh neidaw wa em da ki spah tylli ki kari Truck wa ki Dumper kiwa kit yei khia iwa palat yow pood, kiwa lai wa wan lyngba yong utai u sarok, iwa da booh haroh ya ki sarok kamjooh ki yingkieñ kam ka yingkieñ Sunapur wa kiwi kiwi ki yingkieñ kiwa em hapoh yong ka District hei maa wa khroo bha katkam wa man kattæ.
Kam wow pynkynmoo, ka JAC da lai yachem ko wa ki bor sorkar, nadooh hapoh ka District hadooh ka jylla wei wa da yaklam ko boon boon sien hajrong i sih palat yong u sarok NH-6, wei i em hei maa yong ki yingkieñ kiwa em hapoh yong ka District neidaw wa yoh mon palat ki Truck deilang ki Dumper u kit palat pood katwa ngait hi ki i khia, wei ka JAC da jooh kyntu haroh ko boonsien ya ki bor sorkar wow chna pynbha ya utai u sarok wei kamjooh leh u khang katkam ki aiñ yei kit palat pood kitai ki kari kiwa lai lyngba yong u NH-6 wa kiwi kiwi ki sarok hapoh yong ka District, tangwa sepai hi-eh itai i yaklam yong ka JAC wa ki bor sorkar, neibhah katkam wa man kattæ u sarok NH-6 nangjoor nangjoor biang i sih u, wei ki kari wa kit palat pood kamwa jooh hi lai wan ki lyngba yong uni u sarok.
Ini wa dep da em leh i yakhih paidbah yong kiwa chong chnong yong ka thaaiñ Namchiang Elaka Narpuh wa i ood i yaam yong ki paidbah wa ki seiñ waphær yong ka East Jaiñtia Hills heiwa ka sorkar da dep ko u pyndur u chna pynbha malu mala ya u sarok tangwa ka JAC da pynsñiaw ko ha u Deputy Commssioner wa katkam wa man kattæ, utai u sarok da sih biang u iwa da pynman ya ki kari heh wa ki kari khian u sah kut ki da ki sngi wa ki tayaaw ha katai ka thaaiñ kat hadooh kini ki sngi.
Ha katai ka yachem wow Deputy Commissioner, ka JAC da dawa joor haroh ko na oo kam uwa mihkhmat yong ka sorkar ha ka District wow pynbha ya utai u sarok NH-6 ha katai ka thaaiñ wei wow pynkrehkaam ya ka aiñ katkam ka Motor Vehicle Act, 1988 wa ka Prevention of Damages to Public Property Act, 1984 wei kamjooh leh katkam ka hukum yong ka Meghalaya High Court kawa da pynmih ha ka 31-03-23 yow khang wei wow pynrkhiñ yei kit palat pood ki Truck wa ki Dumper kiwa lai luti lyngba ki sarok wa ki yingkieñ kiwa em hapoh yong ka East Jaiñtia Hills, khnang yow lait ki u jæd u pra wei u oor u haap, khnang wa yow lait ko u ktah ya ki paidbah wa lai wa wan.
Discussion about this post