Ka seiñ JSU hapoh i yahkhmat u President ka JSU Shillong Circle u Treiborlang R Suchen wa u Eddy K Pohtam u President ka War Jaiñtia Circle wa ki dkhot ka seiñ da lai yachem ki ya u montri ka chnat i chait i khiah u A.L. Hek hadien wa pynslem ka sorkar, ka Nation Health Mission wa ka GVK EMRI wow e bhah Ambulance 108 ya ka Amlarem Civil Sub-Division kawa em yaka CHC ha Nongtalang wot hadien wa ka sorkar da dep thied ko ya ki Ambulance thymme na ka poisa wa e sñiawbha ki paidbah cha u Montri Rangbah lyngba ka CM Relief Fund.
U Treiborlang R Suchen da ong u wa ka seiñ da booddien ko ya ini nadooh u snem 2018 yow yoh Ambulance heiwa da rah yaka Ambulance ka GVK EMRI na Nongtalang CHC cha Khliehtyrshi.
U Eddy K Pohtam da ong u wa ka Ambulance 108 man ko kawa emkaam palat wow em ha ka thaaiñ neibhah wa man ko ka Civil Sub-Division kawa da rim bha wei kawa heh kawa em hadooh kamwa 98 tylli ki chnong.
