Jowai: Ki ar tylli ki seiñbhalang na ri-loom Jaiñtia ka JYF (CB) wa JSU (CB) ynne ka sngi ka 10 tarik hapoh i yahkhmat u O.L. Tariang, President JYF (CB), wa u J. Shylla, General Secretary, JSU (CB), deilang wa ki kattu katni ngut ki dkhot yong kini ki ar seiñ da lai yachem ki ya ka Medical Superintendent ka Dr. Norman, Tunnel Hospital, Jowai, ka Dr. D. Nongpluh, hadien wa yoh ujor ki na kiwa boon ki paidbah khamtam ki kynthai kiwa kha khon wa kiwi won kiwa kjut hajrong wa slem u pynkrehkaam ya ka Megha Health Insurance Scheme (MHIS) Phase 4 ha kani ka Hospital.
Hajrong ini i bynta, ka Medical Superintendent, da pyntip ko wa neidaw wa kani ka Scheme em yatoh ko waka Ayushman Bharat Yojana, ka Scheme yong ka sorkar pyrdi, kamtæ katwa ym pu ye u pynbiang ya ki kot ki sla kiwa emkaam, ym pu ye wow pynkrehkaam ya kani ka Scheme.
Da pyntip ko leh wa i pynbiang ya ki kot ki sla dang lai ki cha khmat wei daw pyndep noh smat ya kiwa emkaam waroh yow ye u pynkrehkaam ya kani ka Scheme.
Kamtæ neiliang ki ar seiñ da kyrpaad ki ya ki paidbah wow man kiwa yaichah chipor wa i pynkrehkaam ya ka MHIS ha kani ka Hospital. Ha i jooh i por kini ki ar seiñ daw boodien ki ya kani ka kaam.
Discussion about this post