Jowai: Ka KSU Jaiñtia Hills District Unit hapoh i yahkhmat yong u Albinus Lamurong, Asst. General Secretary, ynnin ka 22 tarik da lai yachem ki wa ki heh yong ka GR Infrastructure Ltd. (GRIL) ha yung krehkaam yong ka ha Mynkre (Base Camp, East Jaiñtia ) wow pynbait ya ki kattu katni i thoh bakla ya ki pyrtuid ki chnong ki thaw, ki dong wa kiwi kiwi de ki thaw ha ki Signboard wa em tymbud u sarok bah NH-44 hapoh East /West Jaiñtia Hills District.
Ka seiñ da yaklam wei da e ko leh ya ka dorkhat ha u Safety Manager & Dy. General Manager yong kani ka Company yow pynbait yei pyrtuid bakla wa thoh kam Kheleriat heithaw Khliehriat , Sonapur heithaw u thoh Sonapyrdi , 8th Mile heithaw Phramer , Garampani heithaw Saphai/Iooksi wa kiwi kiwi de.
Neiliang ka Company da pdiang ko wow pynbait tangwa daw chimpor hadooh chi bnai neibhah yow chon ya kini ki Signboard haap phah cha Udaipur, Rajasthan wei daw ha phah chna leh sa kiwi ki bynta wow pynyieñ ya ki Signboard.
Ka KSU da e yumut ko leh ya ka GRIL wow yaklam ki wa ki Waheh Chnong, ki dkot chnong lada ym tikna ki ya i pyrtuid ki chnong chwa wow booh ki ha ki Signboard.
Discussion about this post