Ka KSU Khanduli-Umshangiar Unit da yachem ko wa u DC ka West Jaiñtia Hills District ynnin ka 11 tarik heiyatoh wa i eh i khoo ka thaaiñ Khanduli-Umshangiar.
Ka seiñ hawa yachem wa u DC da yaklam ko ya ki 3 tylli ki phang wa kynthup yaka bai kari na Khanduli cha Jowai, i dai kiad dai, dai tim wa pyrchah yaka aiñ wa i pynkreh sarok wa i thung chrot bordiñ wa pyrchah yaka aiñ daka sorkar Assam.
Ka seiñ da ban joor ko ha u DC wow e hukum yow pynhiar yaka bai kari cha ka T. 100 kamwa jooh man chwa ka Lockdown. U DC da ong u wa ka sorkar ym pu ye ko wow mynjur ya i dawa yong ka seiñ, tangwa u DC da kular u wow kdoh u khoom yei rukom thap bru wa palat ya iwa da booh daka aiñ. Wei daw phah yaki pulit wow lai pait ki yei leh tam wei chim kabu kiwa yah kari.
Hajrong i dai kiad wa i dai tim pyrchah yaka aiñ iwa da pynsih yaka imlang sahlang, u DC da kular u wow phah hukum cha ki pulit waka chnat Excise wow leh ya iwa emkaam. Da kular u leh wow phah ya u Block Development Officer (BDO), Thadlaskein C&RD Block wow pynman yaka takit heiyatoh wa i chna sarok wei thung chrot bordiñ pyrchah yaka aiñ daka Assam hapoh ki thaw yong ka chnong Khanduli lyngba ka khloo Samynthoo-Mokoiram.
Kamtæ u DC da kular u wow chimkhia yow pyndep ya ka takit hajrong kini ki kaam hapoh chi tayaw.
Neiliang won ka Khasi Student’s Union Nangbah Unit, ynnin ka 11 tarik da yachem ko wa u Executive Engineer yong ka Public Work Department(PWD) North Jowai Division Jowai yow dawa chna pynmiat ya u sarok haka chnong Nangbah uwa da sih bha katni.
