Ka Khasi Students Union Laskein Circle ynne ka sngi hapoh i yahkhmat u Justice Paul Lyngdoh Asst. Publicity Secretary ka KSU Laskeiñ Circle, da lai yachem ki ya u Sniawbhalang Dhar u Montri ka sorkar jylla ha Circuit House, Jowai neibynta wow booh ya i dawa wow pynku kyrdan yaka Laskein C&RD Block cha ka Civil Sub Division.
Ka seiñ hei thoh iwa da phah cha u Montri da ong wa ka Laskein C&RD Block toh ka Block kawa da rim tam wei kawa da booh mooyurim ha u snem 1973 wei da em ko hadooh 96 tylli ki chnong wa kynthup leh yaki chnong khappood waka Assam wei da em ko palat 92 hajar tam ki paidbah wa chong chnong wa kynthup leh ya ar tylli ki Constutuency kitæ ka Mowkaiaw waka Raliang.
Hajrong kini ki yurim ka seiñ da pynsñiaw ko wa da em hok wow pynku kyrdan noh ya kani ka Block.
Neiliang u Sniawbhalang Dhar da kular u wow chimkhia ya kani ka kaam wei ha i jooh i por da kular u leh wow pynpoi ya itai i thoh yong ka seiñ cha u Montri Rangbah ka jylla neibynta wow yoh u bichaar bniah ya ini i kaam.
