Khliehriat: Ka seiñ SBYWA dei sñiawkhia yeiwa jia ha ki thaaiñ khappood kam ha Dawki ha kini ki tayaw wa dadep da pynsyir mynsien ko ya ki paidbah wa chong chnong ka thaaiñ neidaw wa wan hiar thma ki suba Bangladesh wow lute wei u choh u bom ya ki chipai BSF, wei da lute ki leh ya ki bru ha Lad Darang wa ha chnong Amdoh kawa em hajan Rongtilla BOP.
Kamtæ ka Association da lai yachem ko markhmat ya ki bor synchaar District yong ka East Jaiñtia Hills wa kynthup ya u SP wa ya DC heiwa da kyntu ya ki wow pynjoor ki ya i sonteri ha ka thaaiñ khappood Hingaria-Borkhat-Kwator niebhah da suba joor wa em ki dkhar Bangladesh wa wan wa psiah lyngba kani ka thaaiñ khamtam lyngba u sarok Rymbai Bataw Borkhat Kwator heiwa dang man laitlooid bha ka luti ya ki.
U S. Shadap, da ong u wa chwa wow jia iwon iwon iwa sñiawsih hapoh ka thaaiñ emkaam bha wow man ki kiwa paitsiar nadooh ki bor synchaar District hadooh kiwa kitkaam chnong khamtam wow yada nei wan psiah wan poi ki dkhar Bangladesh neibhah ka thaaiñ em ko marjan bha wa u pood u ang ka ri Bangladesh kawa dang lait bha.
Kamtæ ka seiñ da e por ko leh ya u SP hapoh artayaw wow leh yeiwa emkaam lym kamtæ ka Association daw chim ko i bor wow sonteri ya kani ka thaaiñ.
Ka seiñ da ong ko leh wa daw yachem ko ya ki chipai yada khappood ki BSF yong ka thaaiñ Hingaria khnang wow pynjoor ki u khang yei psiah ki dkhar Bangladesh chapoh u pood ka ri.
Discussion about this post