Ka Synjuk Waheh Chnong da wan yachem ko wa kiwa saam kum Gas namo ki LPG Distributor ha Jowai wa kynthup ya ka Ri-Pnar Gas Agency waka Rymbai Gas Agency heijooh i por leh waka Inspector ka Supply Department heiyatoh wa i pynpoi kum LPG cha thlu yung bru.
Neiliang waroh ar ki Gas Agency da kyi ki wa i dor u tadong wa chim ki katni man i T. 1091.48 wei ini toh i dor wow pynpoi hadooh ha yung bru iwa da kubur leh da ka Supply Department.
Tangwa i eh ya ki Gas Agency toh wa lada li booh ki cha ki thlu yung bru ym ye ki wow pyndep ha chi sngi wei neitæ i daw da pynbaitlang wa ki dong ki chnong wow wan li thooh ki bru na ki thaw wa da ya pynbait.
Ki yung wa em ha rood sarok wa em hei luti wa lai ka kari kit tadong Gas ye hi ki wow e ha ki lada yang ki ha pchem yong ki katwa kitu kiwa em hajan i thaw wa da booh ye ki wow lai chim khlem da chim yei bai kit.
Ki yung kiwa jngai na ki thaw pynhiar tadong ye ki u phah kit deiwa su ki T. 20 lait noh kiwa da jngai ware wei ini chong i ha kiwa wan thooh Gas wa kiwa rah Gas. Da ong haroh ki wa kiwon kiwon ki yung wa chem chitom lane kiwa chah chim dor palat ya i dor kamjooh ka bai kit yei ki wow wan chakhmat wow ujor cha ki yow tip ki u leh yeiwa emkaam.
I dor ka tadong LPG man ki kamni:
Kawi ka LPG- T. 1020
Bai kit- 19.50
CGST- T. 25.988
SGST- T. 25.988
Waroh dapoi T. 1091.475.
Ha kawi won ka khubor, ka Synjuk da dep phah chithi ko cha ka West Jaiñtia Hills Local Taxi Owners & Driver’s Association hajrong i pynku bai kari heiwa da khut ya ki wow wan ki cha ka yalang tangwa hadooh katni ym pu em e jubab ki.
