Jowai: Hajrong i dooh khih ki khynroo ka EJH kiwa da pyndep ya ka kyrdan puræ Automobile wa Civil Engineering wa kiwi kiwi, hanlada pyndep ki ya kini ki puræ na ki thaw waphær waphær, ki ar seiñ wa kynthup ya ka JSM wa ka HYC da pynman ki ya ka yalang wa tip kam ka Conference on Qualified Unemployed Youth ha kani ka 10 tarik wa da dep ha chnong Khliehmyntriang.
Ya kani ka yalang da pynlai da u Skhembhalang Dkhar uwa man kam u Publicity Secretary ka JSM – Central Body heiwa da yoh ya ki kyntien lamkhmat na u President ka JSM-Eastern Region, u Shnalad Rymbai uwa da pynche ya ki kattu katni ki phang hajrong kini ki kaam.
Da yoh leh ya i pynsñiaw ya ki daw wa i eh i khoo wa pynman ya kani ka Conference iwa kynthup ya i rukom thung kreh hapoh ka District da ka luti wa khooid, i boon ki baar jylla kiwa khih mylla, ki karkhana pynmih khyndaw-bilat wa i yoh myntoi ki tre jylla, ki kaam ka yung-krehkaam ka Employment Exchange wa kiwi kiwi.
Ki kattu katni ki rai wa da chim toh wow pynkhooid ya i rukom thung kreh sorkar kawa yooh beiñ yei hok kitu kiwa ym yoh laad.
I boon ki wakreh da ki baar jylla kam ha ki dukan dai tiar kari, ki thaw chna kari, ki Telecom Company, ki Agency wa kiwi de ki Company ki bru samen waphær waphær.
I wym bood ki Cement Plant yaka Reservation Policy wow e bhah ya ki tre chnong wow yoh kreh hapoh kini ki karkhana, kiwa boonsien wa paan yaka Experience Certificate wow pynyoo heiwon de ki thaw wa da dep kreh ki.
I wym biang krehkaam ka yung krehkaam Employment Exchange kawa boon sien ym jooh pynemkaam ko ya ki kyndon wa toh u bood ko.
Ha kani ka yalang da rai wow pdiang leh ya kwi kiwi de kiwa da dep puræ Engineering nalor ki Automobile wa Civil Engineering.
Da yakut leh wow chna yaka Working Group ka wow pyllang yutip yow pyntip leh ya iwa chem ki.
Ha kani ka yalang neiliang ki ar seiñ da kular ki wow booddien wow leh yeiwa emkaam hajrong kani ka phang neibynta ki khynroo khyllood ka ri-loom Jaiñtia.
Discussion about this post